Zelenskiy Rossiyaga qarshi 40 kunlik maxsus operatsiya e'lon qildi
Operatsiyaning mazmuni hozircha oshkor etilmagan.
Ukraina prezidenti Vladimir Zelenskiy Ukraina Xavfsizlik xizmati tomonidan Rossiyaga qarshi amalga oshiriladigan 40 kunlik maxsus operatsiyani ma’qullaganini ma’lum qildi. Operatsiya tafsilotlari hozircha oshkor etilmagan.
Zelenskiy bu haqda SBU rahbari Yevgeniy Xmara bilan o‘tkazilgan uchrashuv yakunlari yuzasidan o‘zining Telegram kanalida ma’lum qildi.
Prezidentning bildirishicha, uchrashuv davomida uzoq va o‘rta masofali zarba berish rejalari, shuningdek, SBUning "Alfa" maxsus operatsiyalar markazining frontdagi faoliyati yuzasidan hisobot tinglangan.
Zelenskiy SBU tomonidan turli turdagi dronlardan foydalanish Ukraina mudofaa kuchlarining frontdagi samaradorligini sezilarli darajada oshirganini qayd etgan.
Shuningdek, u "urushni yakunlash maqsadida tajovuzkor davlatga ta’sir o‘tkazishga qaratilgan 40 kunlik operatsiyani ma’qullaganini" bildirgan. Biroq operatsiyaning mazmuni, ko‘lami va amalga oshirish mexanizmlari haqida qo‘shimcha ma’lumot berilmagan.
Ma’lumki, SBUning "Alfa" maxsus bo‘linmasi terrorizmga qarshi kurash, maxsus operatsiyalar hamda Rossiya hududidagi ayrim strategik obyektlarga uyushtirilgan dron hujumlarida ishtirok etishi bilan tanilgan.
Eslatib o‘tamiz, so‘nggi oylar davomida Ukraina Rossiyaning energetika infratuzilmasiga zarbalarni kuchaytirgan. Xususan, neftni qayta ishlash zavodlari va yoqilg‘i omborlariga uyushtirilgan hujumlar ortidan Rossiyaning ayrim hududlarida yoqilg‘i taqchilligi kuzatilgani va benzin savdosiga vaqtinchalik cheklovlar joriy etilgani haqida xabarlar berilgan.
