Miltiq, patron va o‘qlar bojxona chegarasidan o‘ta olmadi
“Navoiy” chegara bojxona postida qurol va patronlarni noqonuniy olib kirishga bo‘lgan ikki holat fosh etildi.
Davlat bojxona xizmati xodimlari tomonidan o‘tkazilgan bojxona nazorati davomida mamlakat hududiga qurol va o‘q-dorilarni noqonuniy olib kirishga bo‘lgan ikki holat aniqlandi. Bu haqda viloyat bojxona boshqarmasi matbuot xizmati xabar berdi.
Ma’lum qilinishicha, “Navoiy” chegara bojxona posti orqali piyoda kirib kelgan fuqaroning qo‘l yuki tekshirilganda, og‘zaki so‘rovda ma’lum qilinmagan hamda yo‘lovchi bojxona deklaratsiyasida qayd etilmagan 1 dona “KRAL ARMS” rusumli miltiq va 44 dona “SPOTXON” rusumli o‘q borligi aniqlangan.
Yana bir holatda esa boshqa bir yo‘lovchining qo‘l yuklari bojxona ko‘rigidan o‘tkazilganda, deklaratsiyada ko‘rsatilmagan 1 dona “RETAY G19C” rusumli to‘pponcha hamda 30 dona “Kaiser” rusumli patron borligi fosh etilgan.
Hozirda har ikki holat yuzasidan tegishli tartibda surishtiruv ishlari olib borilmoqda.
Eslatib o'tamiz, avvalroq “Navoiy” chegara bojxona postida yo‘lbarssimon bo'g'ma ilonni O‘zbekiston hududiga noqonuniy olib kirishga urinish fosh etilgani xabar qilingan edi.
