Pokiston Afg‘onistonning uchta viloyatiga hujum qildi
Afg‘oniston bilan chegarada o‘tkazilgan maxsus operatsiyada 29 nafar jangari yo‘q qilingan.
Pokiston xavfsizlik kuchlari Afg‘oniston bilan chegaradosh hududlarda terrorchilik guruhlariga qarshi maxsus harbiy operatsiya o‘tkazdi. Mamlakat rasmiylariga ko‘ra, amaliyot davomida 29 nafar qurolli jangari yo‘q qilingan. Bu haqda Reuters xabar berdi.
Pokiston axborot va radioeshittirish vaziri Attaulloh Tararning ma’lum qilishicha, operatsiya Xayber Paxtunxva va Balujiston viloyatlarida tinch aholiga, shuningdek, Karachi shahridagi Reynjerlar shtab-kvartirasiga uyushtirilgan hujumlarga javoban amalga oshirilgan.
Qayd etilishicha, xavfsizlik kuchlari Pokiston–Afg‘oniston chegarasi yaqinida joylashgan "Jamaat-ul-Ahrar" va "Fitna-ul-Xavorij" guruhlariga tegishli boshpanalar hamda istehkomlarga nishonli zarbalar bergan.
Vazirning bildirishicha, Xayber Paxtunxva viloyatining Bajaur tumanida o‘tkazilgan operatsiya davomida yuqori martabali dala qo‘mondoni Xon Farosh ham yo‘q qilingan.
Eslatib o‘tamiz, bundan bir kun avval qurolli shaxslar Karachi shahridagi Reynjerlar shtab-kvartirasiga hujum uyushtirgan edi. Hujum oqibatida uch nafar harbiy xizmatchi halok bo‘lgan. Rasmiy ma’lumotlarga ko‘ra, hujumchilardan uch nafari yo‘q qilingan, yana biri qo‘lga olingan. Dastlabki tergov natijalariga ko‘ra, hibsga olingan shaxs Afg‘oniston fuqarosi ekani aniqlangan.
