Toshkentda kuchli shamol: hokimlik aholini ogohlantirdi
Noqulay ob-havo sabab simlar uzilishi, daraxtlar qulashi va chang miqdori ortishi mumkin.
Toshkent shahrida kuchli shamol kuzatilayotgani munosabati bilan poytaxt hokimligi fuqarolarni ehtiyot choralariga qat’iy rioya qilishga chaqirdi.
Ma’lum qilinishicha, noqulay ob-havo sharoiti sababli elektr uzatish tarmoqlarida simlarning uzilishi, daraxtlarning qulashi hamda havoda chang miqdorining ortishi ehtimoli mavjud.
Shu munosabat bilan fuqarolarga avtomobillarni daraxtlar va elektr uzatish liniyalari ostida qoldirmaslik, zarurat bo‘lmasa ko‘chaga chiqishni cheklash, ayniqsa allergiya yoki changga sezuvchanligi yuqori bo‘lgan shaxslarga ehtiyot bo‘lish tavsiya etildi.
Shuningdek, shahar bo‘ylab harakatlanishda hushyorlikni oshirish, o‘zining va yaqinlarining xavfsizligini ta’minlash hamda shaxsiy mulkni ehtiyot qilish so‘raldi.
Favqulodda vaziyatlar yuzaga kelganda fuqarolar 1050, 1055, (71) 212-69-80 va (71) 212-69-82 telefon raqamlari orqali tegishli xizmatlarga murojaat qilishlari mumkin.
