Hindistondagi suv toshqinlari 22 mingdan ortiq aholiga zarar yetkazdi
Toshqinlar 96 ta qishloqni suv ostida qoldirdi, minglab aholi xavfsiz hududlarga evakuatsiya qilinmoqda.
Hindistonning Assam va Arunachal-Pradesh shtatlarida kuzatilgan kuchli yog‘ingarchilik oqibatida yuzaga kelgan suv toshqinlari 22 mingdan ortiq aholiga zarar yetkazdi. Bu haqda Hindustan Times nashri xabar berdi.
Ma’lum qilinishicha, suv toshqinlari Assamning oltita tumanini qamrab olgan bo‘lib, eng ko‘p zarar Dhemaji tumanida qayd etilgan. Mazkur hududda 15 400 nafardan ortiq aholi jabr ko‘rgan.
Tabiiy ofat oqibatida 96 ta qishloq suv ostida qolgan, qariyb 1 690 gektar qishloq xo‘jaligi yerlari zarar ko‘rgan. Shuningdek, 1965-yilda qurilgan temir yo‘l ko‘prigining bir qismi qulab tushgani ma’lum qilindi.
Arunachal-Pradesh shtatida esa kuchli yog‘ingarchilik oqibatida uch kishi halok bo‘lgan.
Rasmiylar uy-joyidan ayrilgan aholini vaqtinchalik boshpanalarga joylashtirmoqda. Tabiiy ofat 48 mingdan ortiq chorva va boshqa hayvonlarga ham salbiy ta’sir ko‘rsatgani qayd etilgan.
Sinoptiklar 28-iyundan 1-iyulgacha hududlarda kuchli yomg‘ir va momaqaldiroq davom etishini prognoz qilmoqda. Shu bois yangi suv toshqinlari va ko‘chkilar yuzaga kelishi xavfi saqlanib qolmoqda.
