Hozircha AQSh bilan yangi muzokaralarni boshlash rejalashtirilmagan — Eron
Tehron yakuniy kelishuv bo‘yicha muzokaralar memorandumdagi asosiy majburiyatlar bajarilgandan keyingina boshlanishini bildirdi.
Eron yaqin kelajakda AQSh bilan hech qanday darajada yangi muzokaralarni boshlashni rejalashtirmayotgani ma’lum qilindi. Bu haqda Eron Tashqi ishlar vazirligi rasmiy vakili Ismoil Bag‘ayi ma’lum qildi deydi Tasnim.
Uning so‘zlariga ko‘ra, Eron ekspertlar delegatsiyasi erishilgan kelishuvlar ijrosini monitoring qilish maqsadida Qatar poytaxti Dohaga yo‘l oladi.
Bag‘ayi AQSh memorandumning neft savdosiga oid 10-bandi doirasida o‘z zimmasidagi majburiyatlarni bajarish yuzasidan zarur ruxsatnomalarni berganini, shuningdek, Eron aktivlarini blokdan chiqarishga oid 11-band ijrosi ham monitoring bosqichida ekanini ta’kidlagan.
"Eron hali yakuniy kelishuv bo‘yicha muzokaralarni boshlagani yo‘q. Memorandumning 13-bandiga muvofiq, bunday muzokaralar 1, 4, 5, 10 va 11-bandlarda nazarda tutilgan majburiyatlarning amalda bajarilishiga bog‘liq", — degan TIV vakili.
Ma’lumot uchun, memorandumning birinchi bandida barcha frontlarda harbiy harakatlarni to‘liq va doimiy to‘xtatish nazarda tutilgan. Shuningdek, hujjatda AQShning Eron nefti eksportiga oid cheklovlarni yumshatishi, Eronning muzlatilgan aktivlarini bosqichma-bosqich blokdan chiqarishi hamda Fors va Ummon ko‘rfazlarida savdo kemalari qatnovini tiklash bo‘yicha majburiyatlar ham belgilangan.
