Toshkentda YTH oqibatida Lacetti ikkiga bo‘linib ketdi
Hodisada jabrlanganlar holati haqida hozircha rasmiy ma’lumot berilmagan.
Toshkent shahrining Yunusobod tumanida sodir bo‘lgan yo‘l-transport hodisasi oqibatida Lacetti rusumli avtomobil jiddiy shikastlanib, ikki qismga bo‘linib ketdi. Hodisa aks etgan videotasvirlar ijtimoiy tarmoqlarda keng tarqaldi.
Toshkent shahar Yo‘l harakati xavfsizligi boshqarmasi matbuot xizmati ma’lum qilishicha, hodisa 30-iyun kuni soat 05:10 atrofida Amir Temur va Bog‘ishamol ko‘chalari chorrahasida yuz bergan.
Dastlabki ma’lumotlarga ko‘ra, Amir Temur ko‘chasi bo‘ylab harakatlanayotgan Lacetti rusumli avtomobil o‘ng tomondan harakatlanib kelayotgan Kia K5 rusumli avtomobil bilan to‘qnashgan. Kuchli zarba oqibatida Lacetti avtomobili ikki qismga ajralgan.
Hozirda mazkur yo‘l-transport hodisasi yuzasidan Toshkent shahar IIBB YHXB mas’ul xodimlari tomonidan surishtiruv ishlari olib borilmoqda.
Rasmiy ma’lumotda hodisa oqibatida jabrlanganlar yoki avtomobillarda bo‘lgan shaxslarning holati haqida ma’lumot keltirilmagan.
