Venesuelada zilzila qurbonlari soni 1 700 nafardan oshdi
Zilzila oqibatida 15 866 kishi uy-joyidan ayrilgan, qidiruv-qutqaruv ishlari davom etmoqda.
Venesuelada sodir bo‘lgan ikkita kuchli zilzila oqibatida halok bo‘lganlar soni 1 719 nafarga yetdi. Bu haqda mamlakat Milliy Assambleyasi spikeri Xorxe Rodriges ma’lum qildi deydi dw.com.
Rasmiy ma’lumotlarga ko‘ra, tabiiy ofat oqibatida 5 034 kishi turli darajada tan jarohati olgan, 15 866 nafar fuqaro esa uy-joyidan ayrilgan.
Avvalroq qurbonlar soni 1 450 nafar ekani ma’lum qilingan edi. Rasmiylar qidiruv-qutqaruv ishlari davom etayotgani sababli halok bo‘lganlar soni yana ortishi mumkinligini istisno etmayapti.
Eslatib o‘tamiz, 24-iyun kuni kechqurun Venesuelada ketma-ket ikkita kuchli zilzila sodir bo‘lgan. Taxminan 40 soniya oralig‘ida qayd etilgan zilzilalarning magnitudasi 7,2 va 7,5 ballni tashkil etgan. Ularning epitsentri Yarakuy shtatida, bir-biridan qariyb 10 kilometr masofada joylashgan.
