Venesueladagi zilzilada AQShdan deportatsiya qilinganlar joylashtirilgan mehmonxona qulab tushdi — ABC
Mehmonxona vayron bo‘lishi oqibatida ayrim deportatsiya qilingan fuqarolar halok bo‘lgan, boshqalari esa bedarak yo‘qolgan.
Venesuelada yuz bergan kuchli zilzila oqibatida AQShdan deportatsiya qilingan venesuelaliklar vaqtincha joylashtirilgan mehmonxona qulab tushdi. Bu haqda ABC News xabar berdi.
Ma’lum qilinishicha, 24-iyun kuni ertalab AQShdan deportatsiya qilingan 146 nafar fuqaro Venesuelaga olib kelingan. Ularning 100 nafardan ortig‘i Karakasdan 30 kilometr uzoqlikdagi La Guaira shtatida joylashgan mehmonxonaga joylashtirilgan.
O‘sha kunning kechki qismida mamlakatda ketma-ket ikkita kuchli zilzila sodir bo‘lgan. ABC telekanaliga deportatsiya qilingan fuqarolarning ayrim qarindoshlari mehmonxona qulagani, oqibatda ayrim insonlar halok bo‘lgani, boshqalari esa bedarak yo‘qolgani yoki omon qolgani haqida ma’lum qilgan.
Eslatib o‘tamiz, 24-iyun kuni Venesuelada 7,2 va 7,5 magnitudali ikkita zilzila qayd etilgan. Ularning epitsentri Yarakuy shtati hududida joylashgan.
So‘nggi rasmiy ma’lumotlarga ko‘ra, tabiiy ofat oqibatida 1 719 kishi halok bo‘lgan, 5 034 kishi jarohatlangan, kasalxonalar va dala tibbiyot punktlarida ro‘yxatga olingan jabrlanganlar soni esa 22 616 nafarga yetgan.
