Dohada AQSh va Eron o‘rtasidagi bilvosita muzokaralar o'tkazilmoqda
Muloqot vositachilar orqali olib borilmoqda.
Qatar vositachiligida Doha shahrida AQSh va Eron delegatsiyalari o‘rtasida bilvosita muzokaralar boshlandi. Bu haqda Al Arabiya telekanali manbalarga tayanib xabar berdi.
Ma’lum qilinishicha, AQSh delegatsiyasi muzokaralar boshlanishi arafasida Qatar vakillari bilan maslahatlashuvlar o‘tkazgan.
Reuters agentligining Eron hukumatidagi yuqori martabali manbaga tayanib xabar berishicha, seshanba oqshomidan buyon Doha shahrida Vashington va Tehron o‘rtasida vositachilar orqali muloqot davom etmoqda. Eron delegatsiyasi Qatar va Pokiston vakillari bilan uchrashuvlar o‘tkazgan bo‘lib, ular orqali AQSh tomoniga tegishli ma’lumotlar yetkazilgan.
Manbaga ko‘ra, chorshanba kuni davom etgan muzokaralarning asosiy mavzulari Eronning muzlatilgan xorijdagi aktivlari hamda Hormuz bo‘g‘ozi bilan bog‘liq masalalar bo‘lgan.
Avvalroq AQSh prezidenti Donald Tramp Eron Amerika tomoni bilan uchrashuv o‘tkazishni so‘raganini ma’lum qilgan edi. AQSh delegatsiyasi tarkibida prezidentning maxsus vakili Stiv Uitkoff hamda Jared Kushner ishtirok etayotgani bildirilmoqda.
Shu bilan birga, Qatar Tashqi ishlar vazirligi vakili Majid bin Muhammad al-Ansariy Dohada AQSh va Eron delegatsiyalari o‘rtasida to‘g‘ridan to‘g‘ri muzokaralar rejalashtirilmaganini, muloqot vositachilar orqali olib borilayotganini ta’kidlagan.
