Kot-d’Ivuarda suv toshqinlari oqibatida 60 ga yaqin odam halok bo‘ldi
Qo‘shni Ganada ham toshqinlar tufayli 12 kishi vafot etgan. Rasmiylar qidiruv ishlari davomida yana qurbonlar aniqlanishi mumkinligini bildirdi.
Kot-d’Ivuarda bir necha kundan buyon tinmayotgan kuchli yomg‘irlar oqibatida yuzaga kelgan suv toshqinlari va ko‘chkilar natijasida kamida 59 kishi halok bo‘ldi. Bu haqda Sky News xabar berdi.
Hukumat vakili Amadu Kulibalining aytishicha, qidiruv-qutqaruv ishlari davom etayotgani bois yana qurbonlar aniqlanishi mumkin.
Tabiiy ofat shanba kunidan boshlab yog‘gan jala yomg‘irlari ortidan yuzaga kelgan. Halok bo‘lganlarning bir qismi mamlakatning iqtisodiy markazi Abidjandagi Attekube va Yopugon tumanlarida qayd etilgan.
Qo‘shni Ganada ham kuchli yog‘ingarchilik keng ko‘lamli suv toshqinlariga sabab bo‘ldi. Mamlakatning turli hududlarida, jumladan poytaxt Akkrada yuz bergan toshqinlar oqibatida kamida 12 kishi halok bo‘lgan.
Dushanba kuni Akkra va unga tutash Tema shahrida ko‘plab ko‘chalar hamda binolarni suv bosib, ayrim hududlarga kirish imkonsiz bo‘lib qoldi. Halok bo‘lganlar orasida Achimota–Agbogbloshie tumanida suv oqimi olib ketgan ona va uning farzandi ham bor.
Gana Milliy yong‘in xizmati ma’lumotiga ko‘ra, suv bosgan hududlarga yetib borish qiyinlashgani sababli qutqaruvchilar harbiylardan yordam so‘rashga majbur bo‘lgan. Seshanba kuni ham ayrim mahallalar qisman suv ostida qolayotgan edi.
Gana Milliy ofatlar boshqarmasi dushanba kuni ertalab aholidan uylariga suv kirayotgani haqida ko‘plab murojaatlar kelib tushganini ma’lum qildi.
Mamlakat meteorologiya agentligi esa hafta davomida, ayniqsa Akkra va uning atrofida yana kuchli yog‘ingarchilik kuzatilishi mumkinligi haqida aholini ogohlantirdi.
