Qashqadaryoda 201 kg kannabis, Toshkentda qariyb 2 kg gashish musodara qilindi
Har ikki holat yuzasidan gumonlanuvchilarga nisbatan jinoyat ishlari qo‘zg‘atilgan. Hozirda tergov harakatlari davom etmoqda.
Qashqadaryo va Toshkent viloyatida o‘tkazilgan tezkor tadbirlar davomida 201 kilogramm kannabis va qariyb 2 kilogramm gashish musodara qilindi. Bu haqda DXX xabar berdi.
Ma’lum qilinishicha, Shahrisabz shahrida yashovchi 1985-yilda tug‘ilgan fuqaro o‘z xonadoni hovlisidagi 5,3 sotix yer maydonida issiqxona tashkil etib, sotish maqsadida 714 tup kannabis o‘simligini parvarishlayotgani aniqlangan.
Ekspertiza xulosasiga ko‘ra, musodara qilingan kannabisning sof og‘irligi 201 kilogrammni tashkil etgan.
Yana bir holatda Toshkent viloyatining Bekobod shahrida yashovchi, 1966-yilda tug‘ilgan, muqaddam sudlangan fuqaro Toshkent shahrining Yunusobod tumanida DXX va bojxona organlari xodimlari tomonidan to‘xtatilib tekshirilgan.
Tekshiruv davomida uning qo‘lidagi sellofan paketdan 1 kilogramm 994 gramm gashish topilib, ashyoviy dalil sifatida rasmiylashtirilgan. Dastlabki ma’lumotlarga ko‘ra, ushbu giyohvandlik vositasi qo‘shni davlatdan kontrabanda yo‘li bilan olib kirilgan bo‘lib, uni Toshkent shahrida sotish rejalashtirilgan.
Har ikki holat yuzasidan gumonlanuvchilarga nisbatan jinoyat ishlari qo‘zg‘atilgan. Hozirda tergov harakatlari davom etmoqda.
