Toshkentdagi xususiy bog‘chada tarbiyachi bolaning og‘ziga mato tiqib, zo'ravonlik qildi
Maktabgacha va maktab ta’limi vazirligi bolalarga nisbatan qo‘pol munosabat holatini nazoratga olib, ishchi guruh tuzilganini bildirdi.
Toshkent shahridagi "Rayyona Kids" nodavlat maktabgacha ta’lim tashkilotida tarbiyachilarning bolalarga nisbatan qo‘pol munosabatda bo‘lgani aks etgan videolar yuzasidan Maktabgacha va maktab ta’limi vazirligi rasmiy munosabat bildirdi.
Vazirlik ma’lumotiga ko‘ra, ijtimoiy tarmoqlarda tarqalgan videolarda tarbiyachilarning bolalarga tazyiq o‘tkazgani, jumladan, bolalardan birining og‘ziga mato tiqqani hamda yana bir bolaning qo‘lini eshik bilan qisgani aks etgan.
Qayd etilishicha, mazkur holat yuzasidan barcha tafsilotlar atroflicha o‘rganilmoqda. Tekshiruv yakunlariga ko‘ra, kasb etikasi va amaldagi qonunchilik talablarini buzgan hamda holat uchun mas’ul bo‘lgan maktabgacha ta’lim muassasasi xodimlariga nisbatan qonuniy choralar ko‘riladi.
Shuningdek, vazirlik bunday holatlarga yo‘l qo‘ygan hamda litsenziya talablariga javob bermaydigan nodavlat maktabgacha ta’lim tashkilotlarining litsenziyasini bekor qilish bo‘yicha ham tegishli choralar ko‘rilishini ma’lum qildi.
Hozirda holat yuzasidan huquqni muhofaza qiluvchi organlar vakillari ishtirokida ishchi guruh tuzilgan bo‘lib, surishtiruv ishlari davom etmoqda.
