Amerika yordami endi Isroil uchun zarur emas — Netanyaxu
Isroil Bosh vaziri mamlakat AQShning moliyaviy yordamidan voz kechishini e'lon qildi.
Isroil Bosh vaziri Benyamin Netanyaxu mamlakat AQShning moliyaviy yordamisiz ham faoliyat yuritishga tayyor ekanini ma’lum qildi deb xabar beradi News 18.
1-iyul kuni o‘tkazilgan matbuot anjumanida so‘zga chiqqan Netanyaxu Isroil iqtisodiyoti hozirgi kunda yetarli darajada mustahkam bo‘lib, AQShdan olinayotgan moliyaviy ko‘makka ehtiyoj qolmaganini ta’kidlagan.
Uning so‘zlariga ko‘ra, hukumat Amerika moliyaviy yordamini bosqichma-bosqich to‘xtatish jarayonini imkon qadar tezroq boshlashni maqsad qilgan.
"Men Amerika yordamini to‘xtatmoqchiman. Bu ijtimoiy yordamga o‘xshaydi va biz endi bunga muhtoj emasmiz", — degan Isroil bosh vaziri.
Netanyaxuning ta’kidlashicha, Isroil iqtisodiyoti endi kichik iqtisodiyot emas va mamlakat AQSh tomonidan ajratilayotgan mablag‘lar hajmini mustaqil ravishda qoplay olish salohiyatiga ega.
Matbuot anjumanida u mintaqaviy xavfsizlik masalalariga ham to‘xtalib, Isroil Falastin davlatining tashkil etilishiga qarshi ekanini yana bir bor bildirgan. Shuningdek, Eron bilan bog‘liq vaziyat yuzasidan zarurat tug‘ilgan taqdirda Isroil yana harbiy choralar ko‘rishga tayyorligini ma’lum qilgan.
Bundan tashqari, Netanyaxu Isroil qo‘shinlari Hizbulloh tahdidi saqlanib qolayotgan ekan, Livan hududida qolishda davom etishini ta’kidlagan.
