Andijondagi zapravkada portlash yuz berdi
Hodisa oqibatida tan jarohati olganlar bor.
2-iyul kuni soat 10:30 atrofida Andijon viloyati Xonobod shahri "Anhor" mahalla fuqarolar yig‘inida joylashgan avtomobillarga gaz to‘ldirish kompressor shoxobchasining kompressor xonasida havo-gaz aralashmasi chaqnadi. Bu haqda viloyat FVB ma’lum qildi.
Xabarga ko‘ra, voqea to‘g‘risidagi murojaat kelib tushgach, qutqaruv bo‘linmalari zudlik bilan hodisa joyiga yetib borgan. Chaqnash oqibatida kompressor xonasining 30 kvadrat metr maydondagi tom qismi, shuningdek, eshik va derazalariga zarar yetgan.
Hodisa natijasida ikki nafar fuqaro tan jarohati olib, ularga malakali tibbiy yordam ko‘rsatish maqsadida shifoxonaga yotqizilgan. Halok bo‘lganlar qayd etilmagan.
Hozirda chaqnashning kelib chiqish sabablari va yetkazilgan zarar miqdori aniqlanmoqda.
