Samarqandda jazo muddatini qisqartirish evaziga 15 ming dollar olgan advokat ushlandi
Shuningdek, 2 ming dollari evaziga sudlanuvchiga yengilroq jazo tayinlatishni va’da qilgan advokat ham qo‘lga olindi.
Davlat xavfsizlik xizmati Jizzax viloyati boshqarmasi hamda viloyat prokuraturasi xodimlari hamkorligida o‘tkazilgan tezkor tadbirlar davomida Samarqand viloyatida faoliyat yurituvchi ikki advokatning noqonuniy faoliyatiga chek qo‘yildi. Bu haqda DXX xabar berdi.
Aniqlanishicha, Urgut tumanida faoliyat yurituvchi advokat mansabdor tanishlari orqali Jizzax viloyatidagi manzil koloniyasida jazo o‘tayotgan mahkumning ozodlikdan mahrum etish muddatini qisqartirib berishni va’da qilgan. Buning evaziga u mahkumning tanishidan 15 ming AQSH dollari olgan vaqtida ashyoviy dalillar bilan qo‘lga olingan.
Yana bir holatda esa Qo‘shrabot tumanida faoliyat yurituvchi advokat jinoyat ishlari bo‘yicha tuman sudida ko‘rilayotgan ishda himoyachi sifatida ishtirok etib, mansabdor tanishlari orqali sudlanuvchiga yengilroq jazo tayinlanishiga yordam berishini bildirgan. Ushbu xizmat evaziga sudlanuvchining o‘g‘lidan 2 ming AQSH dollari talab qilgan.
DXX va prokuratura organlari xodimlari tomonidan o‘tkazilgan tezkor tadbirda advokat talab qilingan pul mablag‘ini olayotgan vaqtida ashyoviy dalillar bilan ushlandi.
Mazkur holatlar yuzasidan advokatlarga nisbatan tegishli moddalar bilan jinoyat ishlari qo‘zg‘atilib, dastlabki tergov harakatlari olib borilmoqda.
