AQSH Nigeriyadan harbiylarining asosiy qismini olib chiqdi

AQSH joriy yil boshida Nigeriyaga yuborgan harbiy xizmatchilarining aksariyatini mamlakatdan olib chiqdi. Ular IShID jangari guruhlariga qarshi kurashda Nigeriya xavfsizlik kuchlarini qo‘llab-quvvatlash uchun safarbar etilgan edi. Bu haqda BBC xabar berdi.

 

O‘tgan yil dekabr oyida AQSH va Nigeriya harbiylari Chad ko‘li havzasida qo‘shma operatsiyani boshlagan. Operatsiya doirasida Rojdestvo kuni jangarilar nishonlariga zarbalar berilgan, oradan ikki oy o‘tib esa qariyb 200 nafar amerikalik harbiy Nigeriyaga yuborilgan.

 

Bir necha oy davom etgan operatsiya natijasida “IShID” terrorchilik guruhi yetakchilaridan biri Abu-Bilol al-Minukiy yo‘q qilingan. AQSHning Afrikadagi Harbiy-havo kuchlari qo‘mondoni general Dagvin Anderson operatsiya muvaffaqiyatli yakunlanganini bildirib, Nigeriyadagi “IShID” rahbariyatiga jiddiy zarba berilganini ta’kidladi. Uning so‘zlariga ko‘ra, qo‘shma amaliyot natijasida guruhning mahalliy qo‘mondonlik tizimi va xalqaro tarmoq bilan aloqalari izdan chiqarilgan.

 

Nigeriya armiyasi vakili general-mayor Maykl Onoja esa BBC’ga bergan izohida amerikalik harbiylarning olib chiqilishi mamlakatning terrorizmga qarshi operatsiyalariga salbiy ta’sir ko‘rsatmasligini aytdi. Uning ta’kidlashicha, ikki davlat o‘rtasidagi razvedka ma’lumotlari almashinuvi davom etadi.

 

Shu bilan birga, AQSH va Nigeriya olib borgan amaliyotlarga qaramay, jihodchi guruhlar, ayniqsa mamlakatning shimoli-sharqiy hududlarida hujumlarni davom ettirmoqda.

 

Tahlilchilarga ko‘ra, “IShID” so‘nggi yillarda o‘z faoliyatini Sahroi Kabirdan janubdagi Afrika davlatlariga yo‘naltirgan. Hozirda guruh hujumlarining qariyb 90 foizi ushbu mintaqada sodir etilmoqda va uning Nigeriyadagi bo‘linmasi eng faol tarmoqlardan biri hisoblanadi.

 

Nigeriya hukumati bir vaqtning o‘zida ekstremistik guruhlar, qurolli banditlar va boshqa jinoiy to‘dalar tahdidiga qarshi kurash olib bormoqda.