“O‘zbekiston katta orzular amalga oshishini butun dunyoga isbotladi” — Infantino
FIFA prezidenti O‘zbekiston terma jamoasini Jahon chempionatidagi tarixiy ishtiroki bilan tabrikladi.
FIFA prezidenti Janni Infantino O‘zbekiston milliy terma jamoasini 2026-yilgi Jahon chempionatidagi tarixiy debyuti munosabati bilan tabriklab, jamoa mamlakat futboli tarixida muhim sahifa ochganini ta’kidladi.
U o‘zining rasmiy sahifasida e’lon qilgan murojaatida O‘zbekiston terma jamoasi nafaqat mamlakat futboli, balki butun dunyo uchun katta orzular amalga oshishi mumkinligini namoyon etganini qayd etdi.
“Siz butun dunyoga va yurtingizdagi insonlarga har qanday katta orzu amalga oshishi mumkinligini isbotladingiz. FIFA Jahon chempionatidagi ilk golingizga stadionda guvoh bo‘ldim va o‘sha lahzada siz hamda muxlislaringiz qanday hayajonni boshdan kechirganini juda yaxshi his qildim”, — dedi FIFA rahbari.
Infantino ushbu tarixiy ishtirok O‘zbekistonda futbolning yanada rivojlanishiga kuchli turtki berishiga ishonch bildirib, milliy terma jamoaga kelgusi musobaqalarda muvaffaqiyat tiladi.
Ma’lumot uchun, O‘zbekiston milliy terma jamoasi o‘z tarixida ilk bor FIFA Jahon chempionatining guruh bosqichida ishtirok etdi. Jamoa guruh bosqichida Kolumbiya, Portugaliya hamda Kongo DRga qarshi bahs olib bordi. Terma jamoaning sardori Eldor Shomurodovning Kongo DR darvozasiga urgan goli esa turnir guruh bosqichining eng chiroyli goli deb topilgan edi.
