AQSh Eron bilan muzokaralarda bir haftalik tanaffus qildi — Tramp
Vashington Eron bilan muzokaralarni marhum Oliy rahbarning dafn marosimi sabab vaqtincha kechiktirdi.
AQSh prezidenti Donald Tramp Vashington Eron bilan olib borilayotgan muzokaralarda marhum Oliy rahbar Ali Xomanaiy dafn marosimi munosabati bilan bir haftalik tanaffus qilganini ma’lum qildi.
Tramp bu haqda Janubiy Dakota shtatidagi Rushmor tog‘i yaqinida AQSh Mustaqillik kuni munosabati bilan o‘tkazilgan tadbirda so‘zlagan nutqida gapirgan
“Ular kelishuvni juda xohlayapti. Biz ularga dafn marosimi uchun bir hafta vaqt berdik”, — degan AQSh prezidenti.
Shu bilan birga, Tramp muzokaralar rasman to‘xtatilganini yoki tanaffus e’lon qilinganini bevosita tasdiqlamagan. Uning bayonoti AQSh va Eron o‘rtasida davom etayotgan muzokaralar fonida yangragan.
Avvalroq, The Wall Street Journal nashri manbalariga tayanib, Tramp Tehron bilan muzokaralar o‘zaro anglashuv memorandumida belgilangan 60 kunlik muddatdan oshib ketishini muammo sifatida ko‘rmayotganini xabar qilgan edi.
Eronning marhum Oliy rahbari Ali Xomanaiy bilan vidolashuv marosimlari 3-iyul kuni Tehronda boshlangan. Dafn marosimining asosiy tadbirlari 4–9-iyul kunlari Eronning bir necha shaharida o‘tkazilishi, yakuniy marosim esa Mashhad shahrida bo‘lib o‘tishi rejalashtirilgan.
