Qashqadaryoda 9 ta avtomobil ishtirokida YTH sodir bo‘ldi
Yuk mashinasining tormoz tizimida yuzaga kelgan nosozlik oqibatida u o‘zi bilan bir yo‘nalishda harakatlanayotgan jami 9 ta transport vositasi bilan to‘qnashgan.
Qashqadaryo viloyatining Shahrisabz tumanida HOWO rusumli yuk avtomobili ishtirokida zanjirli yo‘l-transport hodisasi sodir bo‘ldi.
Viloyat IIB Jamoat xavfsizligi xizmati Yo‘l harakati xavfsizligi boshqarmasi ma’lumotiga ko‘ra, hodisa 3-iyul kuni soat 14:30 atrofida Shahrisabz tumani hududidan o‘tuvchi 70V010 avtomobil yo‘lining 22-kilometrida yuz bergan.
Dastlabki ma’lumotlarga ko‘ra, HOWO rusumli yuk transport vositasining tormoz tizimida yuzaga kelgan nosozlik oqibatida u o‘zi bilan bir yo‘nalishda harakatlanayotgan jami 9 ta transport vositasi — ikki dona Lacetti, Tracker-2, Nexia-1, Nexia-3, Matiz, Damas va Spark avtomobillari bilan to‘qnashgan.
To‘qnashuv zarbasi oqibatida Nexia-1 avtomobili haydovchisi yo‘l chetida harakatlanayotgan piyodani turtib yuborgan.
Jabrlangan piyodaga voqea joyida shifokorlar tomonidan birinchi tibbiy yordam ko‘rsatilgan.
Mazkur holat yuzasidan Qashqadaryo viloyati IIB JXX Yo‘l harakati xavfsizligi boshqarmasi mas’ul xodimlari tomonidan surishtiruv ishlari olib borilmoqda.
