Rossiya Konstantinovka egallanganini ma’lum qildi

Rossiya Mudofaa vazirligi mamlakat qo‘shinlari Ukrainaning Donetsk viloyatidagi strategik ahamiyatga ega Konstantinovka shahrini nazorat ostiga olganini ma’lum qildi. Kiyev esa hozircha bu da’voga munosabat bildirmadi. Bu haqda Reuters xabar berdi.

 

Rossiya prezidenti Vladimir Putinga hisobot bergan Qurolli kuchlar Bosh shtabi boshlig‘i Valeriy Gerasimovning aytishicha, Janubiy qo‘shinlar guruhi Donetsk viloyatini to‘liq egallashga qaratilgan hujum operatsiyalarini davom ettirmoqda.

 

Gerasimov Konstantinovkani Slovyansk–Kramatorsk–Konstantinovka mudofaa chizig‘idagi Ukrainaning asosiy tayanch nuqtalaridan biri deb atadi. Putin esa shahar Donbasning muhim transport va sanoat markazi ekanini ta’kidlab, uning egallanishini strategik yutuq sifatida baholadi.

 

Rossiya Mudofaa vazirligi Telegram kanalida Konstantinovkada olingani aytilayotgan videolar va suratlarni ham e’lon qildi. Ularda vayron bo‘lgan binolar fonida Rossiya bayroqlarini ko‘tarib turgan harbiylar tasvirlangan.

 

Hisobot davomida Gerasimov Rossiya qo‘shinlari Donetsk viloyatining shimolida joylashgan Liman shahri tomon ham oldinga siljiyotganini ma’lum qildi. Uning ta’kidlashicha, ushbu shahar keyingi harbiy harakatlar uchun muhim logistika va strategik ahamiyatga ega.

 

Yig‘ilishda Rossiyaning shimoliy qo‘shinlari qo‘mondoni Yevgeniy Nikiforov Ukraina dronlarining Rossiya neft infratuzilmasiga uyushtirayotgan hujumlarini to‘liq to‘xtatishga hali imkoni bo‘lmaganini aytdi. Bunga javoban Putin Ukraina zarbalari davom etsa, Rossiya qo‘shni hududlarda xavfsizlik zonalarini yanada kengaytirishini bildirdi.

 

Nikiforovning so‘zlariga ko‘ra, Rossiya qo‘shinlari Xarkiv va Sumi viloyatlaridagi chegara hududlarida ham oldinga siljimoqda.

 

Ayni paytda Ukraina prezidenti Volodimir Zelenskiy va boshqa rasmiylar Rossiyaning sharqiy frontdagi hujumlari yil boshidan beri sezilarli darajada sekinlashgani va Ukraina kuchlari ayrim hududlarni qayta nazoratga olganini ta’kidlab kelmoqda. Putin esa bu bayonotlarni "axborot kampaniyasi" deb baholadi.

 

Shuningdek, Zelenskiy o‘tgan oy Putinga bevosita uchrashuv o‘tkazishni taklif qilgani, biroq Kreml bu taklifni rad etgani qayd etildi.

 

AQSh vositachiligida tinchlik muzokaralarini tiklash jarayoni Eron atrofidagi mojaro sabab vaqtincha to‘xtab qolgan. Shunga qaramay, Moskva va Kiyev AQShning maxsus vakillari Stiv Uitkoff hamda Jared Kushnerning yaqin kunlarda tashrif buyurishini kutayotganini ma’lum qilgan.