Tramp Putin va Zelenskiy bilan telefon orqali suhbatlashdi
Alohida o‘tkazilgan suhbatlarda Ukrainadagi urushni tugatish istiqbollari, tinchlik muzokaralari hamda Eron atrofidagi vaziyat muhokama qilindi.
Rossiya prezidenti Vladimir Putin va AQSh prezidenti Donald Tramp o‘rtasida telefon orqali muloqot bo‘lib o‘tdi. Suhbat davomida Ukrainadagi urush, Eron atrofidagi vaziyat hamda tinchlik muzokaralari masalalari muhokama qilindi. Bu haqda Reuters xabar berdi.
Yuriy Ushakovning ma’lum qilishicha, Putin Trampga Rossiya qo‘shinlari Ukrainaning Donetsk viloyatidagi strategik ahamiyatga ega Konstantinovka shahrini nazoratga olgani haqida axborot bergan. Biroq Ukraina prezidenti Volodimir Zelenskiy va mamlakat Qurolli kuchlari Bosh shtabi bu da’voni rad etib, shahar hanuz Ukraina nazorati ostida ekanini ta’kidladi.
Moskva Ukrainadagi mojaroni hal etish bo‘yicha har qanday kelishuv Rossiyaning Donbass ustidan to‘liq nazoratini tan olishni o‘z ichiga olishi kerakligini qayta bildirgan. Kiyev esa bunday talabni qabul qilmayapti.
Avvalroq Zelenskiy Putinni yuzma-yuz uchrashuv o‘tkazishga chaqirgandi, ammo Kreml bu taklifni rad etgan. Ushakovning aytishicha, Tramp AQShning maxsus vakillari Stiv Uitkoff va Jared Kushner tinchlik muzokaralarini davom ettirish uchun yana Moskvaga borishga tayyorligini bildirgan.
So‘nggi haftalarda Vashingtonning diplomatik sa’y-harakatlari asosan Eron bilan bog‘liq vaziyatga qaratilgani sababli Ukraina bo‘yicha muzokaralar sustlashgan. Putin, shuningdek, AQShning Eron mojarosini diplomatik yo‘l bilan hal etishga qaratilgan urinishlari asosiy masalalar bo‘yicha uzoq muddatli va o‘zaro maqbul yechim topishga xizmat qilishiga umid bildirgan.
Suhbat davomida Rossiya prezidenti Donald Trampga Moskvaga tashrif buyurish taklifi hamon o‘z kuchida ekanini eslatgan. O‘z navbatida, Volodimir Zelenskiy Tramp bilan bo‘lib o‘tgan muloqotni "juda yaxshi" deb baholadi. Uning so‘zlariga ko‘ra, tomonlar frontdagi vaziyatni, jumladan, qariyb 1200 kilometrga cho‘zilgan jang chizig‘ini muhokama qilgan.
"Bu urushni yakunlash uchun haqiqiy imkoniyat mavjud. Bu jarayonda AQShning qat’iy pozitsiyasi hal qiluvchi ahamiyat kasb etadi", — dedi Zelenskiy.
Uning qo‘shimcha qilishicha, ikki davlat rahbari NATO sammiti doirasida muzokaralarni davom ettirishga kelishib olgan.
