Toshkentda 18 yoshli qizni shantaj qilib, 300 dollar talab qilgan yigit ushlandi
U qizning shaxsiy foto va videolarini internetda tarqatish bilan tahdid qilib, undan pul undirishga uringan.
Toshkent shahrida Instagram orqali tanishgan voyaga yetmagan qizni shaxsiy foto va videolarini internetda tarqatish bilan qo‘rqitib, undan pul talab qilgan yigit qo‘lga olindi. Bu haqda Ichki ishlar vazirligi xabar berdi.
Ma’lum qilinishicha, 2008-yilda tug‘ilgan qiz Instagram orqali yigit bilan tanishgan. Keyinchalik yigit jiddiy munosabat o‘rnatish niyatida ekanini aytib, undan behayo foto va videolar yuborishni so‘ragan.
Oradan vaqt o‘tgach, u qizdan 300 AQSH dollari talab qilgan. Aks holda, telefonida saqlanayotgan foto va videolarni ijtimoiy tarmoqlarga tarqatib yuborish bilan tahdid qilgan.
Ichki ishlar vazirligi Tezkor-qidiruv departamenti va uning hududiy bo‘linmalari tomonidan Sergeli tumanida o‘tkazilgan tezkor tadbir davomida gumonlanuvchi talab qilgan pulning 200 AQSH dollarini olayotgan vaqtda qo‘lga olingan.
Mazkur holat yuzasidan unga nisbatan O‘zbekiston Respublikasi Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilib, qonunda belgilangan tartibda tergov harakatlari olib borilmoqda.
Ichki ishlar vazirligi ota-onalarni farzandlarining internetdagi muloqotlari va ijtimoiy tarmoqlardagi faolligiga e’tiborli bo‘lishga chaqirdi. Shuningdek, tovlamachilik yoki boshqa turdagi jinoyatlar haqida ma’lumotga ega fuqarolardan ichki ishlar organlariga murojaat qilish so‘raldi.
