Haydovchilar YPX xodimlariga tegishli hujjatlarining asl nusxasini taqdim etishi shartmi?
“Uzkomnazorat” YPX xodimlariga hujjatlarni elektron shaklda ko‘rsatish mumkinligi haqida video e’lon qildi. YHXX esa bu ma’lumotni eski tahrir asosida rad etdi.
Ijtimoiy tarmoqlarda “Uzkomnazorat” matbuot xizmati tomonidan YPX xodimi transport vositasini to‘xtatganida haydovchi hujjatlarini elektron shaklda taqdim etishi mumkinligi haqida video e’lon qilindi. Shundan so‘ng Yo‘l harakati xavfsizligi xizmati (YHXX) ushbu ma’lumotni haqiqatga to‘g‘ri kelmasligini bildirib, uni rad etdi.
Biroq, YHXX “feyk” deb baholagan xabarga raddiyani eski tahrir asosida tayyorlagani ma’lum bo‘lgani haqida xabar tarqaldi. Qayd etilishicha, xizmat o‘z izohida Vazirlar Mahkamasining 2024-yil 27-dekabrdagi 897-son qarorining avvalgi tahririga tayangan.
Holbuki, mazkur qarorga 2026-yil 21-maydagi 271-son qaror bilan o‘zgartirish kiritilgan. Yangilangan tahrirda “ichki ishlar organlari xodimlari tomonidan” degan qo‘shimcha kiritilgan bo‘lib, u raqamli servislar orqali shakllantirilgan hujjatlarni ichki ishlar organlari xodimlariga elektron ko‘rinishda taqdim etish imkoniyatini ham nazarda tutadi.
Shu bois, YHXX raddiyasida amaldagi emas, balki oldingi tahrirdagi huquqiy norma asos qilib olingani haqida savollar paydo bo‘lmoqda.
