Namanganda 27 nafar bolaga noqonuniy diniy ta’lim bergan shaxs ushlandi
Gumonlanuvchi voyaga yetmagan bolalarga oyiga 100 AQSH dollari evaziga noqonuniy diniy ta’lim berib kelgan.
Namangan viloyatining Yangi Namangan tumanida voyaga yetmagan bolalarga noqonuniy diniy ta’lim berish holati aniqlandi. Bu haqda Ichki ishlar vazirligi ma’lum qildi.
Qayd etilishicha, “Xavfsiz va sog‘lom yurt” tezkor-profilaktik tadbirlari doirasida Namangan viloyati IIB, Davlat xavfsizlik xizmati hamda Yangi Namangan tumani IIB xodimlari tomonidan o‘tkazilgan tezkor tadbir davomida qonunga zid diniy ta’lim tashkil etilgani fosh etilgan.
Dastlabki ma’lumotlarga ko‘ra, Yangi Namangan tumanining Yangi Zamin mahallasida yashovchi fuqaro joriy yilning iyun oyidan buyon o‘z xonadonida 27 nafar voyaga yetmagan bolaga oyiga 100 AQSH dollari evaziga noqonuniy diniy ta’lim berib kelgan.
Mazkur holat yuzasidan Jinoyat kodeksining 229²-moddasi 2-qismi bilan jinoyat ishi qo‘zg‘atilib, tergov harakatlari olib borilmoqda.
Shuningdek, noqonuniy diniy ta’lim olgan 27 nafar voyaga yetmaganning ota-onalariga nisbatan Ma’muriy javobgarlik to‘g‘risidagi kodeksning 47-moddasiga asosan bazaviy hisoblash miqdorining besh baravari miqdorida jarima jazosi tayinlandi.
