Qashqadaryoda Nexia-2 avtomobilidagi gaz balloni portladi, bir kishi halok bo‘ldi
Yana ikki nafar fuqaro turli darajadagi tan jarohatlari olgan.
Qashqadaryo viloyati Muborak tumanida harakatlanayotgan Nexia-2 rusumli avtomobilga o‘rnatilgan metan gaz balloni yorilishi oqibatida bir kishi halok bo‘ldi.
Qashqadaryo viloyati Favqulodda vaziyatlar boshqarmasi ma’lumotiga ko‘ra, hodisa 8-iyul kuni soat 07:32 atrofida Muborak tumani “Quruvchilar” MFY hududidan o‘tuvchi A-380 “Qarshi–Buxoro” avtomobil yo‘lining 128-kilometrida sodir bo‘lgan.
Dastlabki ma’lumotlarga ko‘ra, Qarshi shahridan Buxoro viloyati tomon harakatlanayotgan, Buxoro viloyati Qorovulbozor tumanida yashovchi, 1972-yilda tug‘ilgan fuqaro boshqaruvidagi Nexia-2 avtomobiliga o‘rnatilgan metan gaz balloni portlagan.
Hodisa oqibatida avtomobilda bo‘lgan bir nafar fuqaro voqea joyida vafot etgan. Yana ikki nafar fuqaro turli darajadagi tan jarohatlari olib, Muborak tumani tibbiyot birlashmasiga yotqizilgan.
Qayd etilishicha, hodisa oqibatida yong‘in sodir bo‘lmagan.
Hozirda mazkur holat yuzasidan Muborak tumani Ichki ishlar bo‘limi tomonidan surishtiruv ishlari olib borilmoqda.
