AQShga qilingan har bir hujumga Eronga 20 karra zarba beramiz — Tramp

 

AQSh prezidenti Donald Tramp Eron tomonidan amalga oshirilishi mumkin bo‘lgan har qanday hujumga keskin javob qaytarilishini ma’lum qildi. Uning aytishicha, Qo‘shma Shtatlar har bir hujum evaziga Eronga 20 baravar zarba berishga tayyor.

 

Tramp bu haqda Turkiyada o‘tkazilgan NATO sammitidan so‘ng prezident samolyoti bortida jurnalistlar bilan muloqot chog‘ida bayonot bergan.

 

“Biz ularga qattiq zarba berdik. Bu ularning kecha qilgan harakatlariga javob edi. Ular uchta kemaga hujum qilishdi. Agar ular bizga yana zarba bersa, biz ularga 20 marta zarba beramiz”, — dedi AQSh prezidenti.

 

Shuningdek, u AQSh va Eron o‘rtasidagi keng ko‘lamli harbiy mojaro qayta boshlanishi ehtimoli haqida aniq prognoz bera olmasligini bildirib, bunday vaziyat yuzaga kelgan taqdirda AQSh tezkor ustunlikka erishishiga ishonch bildirdi.

 

Trampning so‘zlariga ko‘ra, Eron vakillari Vashington bilan ehtimoliy kelishuv masalasida aloqaga chiqqan. Biroq u Tehronning bunday kelishuvga sodiq qolish-qolmasiga shubha bildirgan.

 

Avvalroq AQSh Markaziy qo‘mondonligi Amerika harbiylari Eronning Hormuz bo‘g‘ozidagi harbiy imkoniyatlarini cheklash maqsadida zarbalarni qayta boshlaganini ma’lum qilgan edi. Shuningdek, Donald Tramp 8-iyul kuni Eron bilan sulh amalda o‘z kuchini yo‘qotganini bildirgan.