Eronda Xomanaiyning dafn marosimidan so‘ng otishma yuz berdi
Imom Rizo maqbarasidan 15 kilometr uzoqlikda sodir bo‘lgan otishma oqibatida ikki kishi halok bo‘lgan.
Eronning Mashhad shahrida sobiq Oliy rahbar Ali Xomanaiyning dafn marosimi yakunlanganidan so‘ng sodir bo‘lgan otishma oqibatida ikki kishi halok bo‘ldi. Bu haqda Sabereen News Razaviy Xuroson viloyati xavfsizlik masalalari bo‘yicha direktor o‘rinbosariga tayanib xabar berdi.
Ma’lum qilinishicha, hodisa Mashhadning g‘arbiy qismidagi Sarfarzan tumanida, Imom Rizo maqbarasi majmuasidan 15 kilometrdan ortiq masofada sodir bo‘lgan. Hozircha otishma sabablari hamda halok bo‘lganlarning shaxsi rasman ochiqlanmagan.
Rasmiylarning bildirishicha, Imom Rizo maqbarasi hududida yoki dafn marosimi o‘tkazilgan yo‘nalishda xavfsizlik bilan bog‘liq hech qanday hodisa qayd etilmagan.
Eslatib o‘tamiz, Ali Xomanaiyning dafn marosimi 9-iyul kuni Mashhadda yakunlandi. U joriy yil 28-fevral kuni AQSh va Isroil tomonidan Tehronga uyushtirilgan havo hujumlari oqibatida halok bo‘lgan edi. Dafn marosimi Imom Rizo maqbarasi hududida o‘tkazilib, marosim shaharning markaziy ko‘chalari bo‘ylab bir necha kilometrga cho‘zilgan.
Hozirda Eron huquqni muhofaza qiluvchi organlari otishma yuzasidan tergov harakatlarini olib bormoqda.
