JCH–2026: So‘nggi daqiqalardagi gol Ispaniyani yarim finalga olib chiqdi

 

Ispaniya terma jamoasi 2026-yilgi futbol bo‘yicha Jahon chempionati chorak finalida Belgiyani 2:1 hisobida mag‘lub etib, musobaqaning yarim finaliga yo‘l oldi.

 

AQShning Inglevud shahridagi SoFi Stadiumda bo‘lib o‘tgan uchrashuvni angliyalik hakam Maykl Oliver boshqarib bordi.

 

Hisob uchrashuvning 30-daqiqasida Ispaniya yarim himoyachisi Fabian Ruis tomonidan ochildi. Belgiya esa birinchi bo‘lim yakunlanishidan oldin javob qaytarishga muvaffaq bo‘ldi. 41-daqiqada hujumchi Sharl De Ketelar hisobni tenglashtirdi.

 

Ikkinchi bo‘limning 71-daqiqasida Belgiya darvozaboni Tibo Kurtua jarohat sabab maydonni tark etdi va uning o‘rniga Senne Lammens maydonga tushdi.

 

Uchrashuv taqdiri asosiy vaqt yakunlanishiga oz qolganida hal bo‘ldi. 88-daqiqada Lammensning xatosidan unumli foydalangan Mikel Merino Ispaniya terma jamoasining g‘alaba golini kiritdi va jamoasini yarim finalga olib chiqdi.

 

Mazkur g‘alabadan so‘ng Ispaniya terma jamoasi 14-iyul kuni bo‘lib o‘tadigan yarim final bahsida Fransiyaga qarshi maydonga tushadi.

 

Ma’lumot uchun, 2026-yilgi futbol bo‘yicha Jahon chempionati AQSh, Kanada va Meksika mezbonligida o‘tkazilmoqda. Musobaqa finali 19-iyul kuni Nyu-York shtatining Sharqiy Rezerford shahrida bo‘lib o‘tadi.