Moskvada dovul oqibatida metro bekatini suv bosdi, ikki kishini chaqmoq urdi
Ob-havoning yomonlashishiga "Bernadett" va Kaspiy dengizi tomondan harakatlanayotgan "Kaspiyets" siklonlarining qo‘shilishi sabab bo‘lgan.
11-iyul oqshomida Moskva va Moskva viloyatida kuchli jala, yirik do‘l hamda dovul kuzatildi. Noqulay ob-havo oqibatida metro bekatini suv bosdi, daraxtlar qulashi sabab tramvaylar harakati to‘xtadi, ikki kishini esa chaqmoq urdi. Bu haqda Meduza xabar berdi.
Ma'lumotlarga ko‘ra, ob-havoning keskin yomonlashishiga Shimoliy Atlantikadan kelayotgan "Bernadett" va Kaspiy dengizi tomondan harakatlanayotgan "Kaspiyets" siklonlarining qo‘shilishi sabab bo‘lgan.
Dovul oqibatida "Trubnaya" metro bekati vestibyulini suv bosgan. Verxniy Susalniy tor ko‘chasida daraxtlar qulagani sabab tramvaylar qatnovi to‘xtatilgan. Shuningdek, "Vinzavod" majmuasidagi binolardan birining tomi uchib ketgan, shahar markazidagi bir nechta yozgi ayvonlar zarar ko‘rgan.
Varshava shossesidagi "Trud" stadionida futbol tomosha qilayotgan ikki erkakni chaqmoq urgan. Oqibatda ular hushidan ketgan.
Sinoptiklar prognoziga ko‘ra, kuchli yog‘ingarchilik dushanbagacha davom etadi. Shu vaqt ichida Moskva hududiga iyul oyidagi yog‘in me’yorining 90 foizigacha yog‘ishi mumkin.
Moskva shahar ma’muriyati aholini zarurat bo‘lmasa shaxsiy avtomobildan foydalanmaslikka hamda metro orqali harakatlanishga chaqirdi. Kuchli jala shanba oqshomida Sankt-Peterburg shahrida ham kuzatildi.
