Qirg‘izistonda amaldorlarga qarindoshlarini ishga qabul qilish va sovg‘a olish taqiqlandi

Qirg‘izistonda davlat fuqarolik va munitsipal xizmatchilari uchun korrupsiyaga qarshi yagona xulq-atvor standartlari tasdiqlandi. Bu haqda Akipress xabar berdi.

 

Yangi qoidalarga ko‘ra, amaldorlarga yaqin qarindoshlarini lavozimga tayinlashda ishtirok etish, ularga xizmat bo‘yicha homiylik qilish hamda xizmat vazifasi bilan bog‘liq sovg‘a va mukofotlarni qabul qilish taqiqlandi.

 

Tegishli standartlar Qirg‘iziston Vazirlar Mahkamasi raisi Adilbek Qosimaliyevning 2026-yil 30-iyundagi farmoyishi bilan tasdiqlangan.

 

Hujjat 2025–2030-yillarga mo‘ljallangan korrupsiyaga qarshi kurash davlat strategiyasini amalga oshirish doirasida qabul qilingan. Unga muvofiq, vazirliklar, idoralar va mahalliy o‘zini o‘zi boshqarish organlari uch oy ichida namunaviy hujjat asosida o‘zlarining ichki korrupsiyaga qarshi standartlarini ishlab chiqishi va amaliyotga joriy etishi lozim.

 

Yangi standartlarga ko‘ra, davlat xizmatchilariga ayrim shaxslar uchun alohida imtiyozli sharoitlar yaratish, davlat mulki va xizmat ma’lumotlaridan shaxsiy manfaat yo‘lida foydalanish ham taqiqlanadi. Xizmat vazifasi bilan bog‘liq sovg‘alarni qabul qilishga faqat rasmiy protokol sovg‘alari bundan mustasno bo‘lib, ular davlat organi balansiga topshirilishi shart.

 

Bundan tashqari, davlat xizmatchilari manfaatlar to‘qnashuvi yuzaga kelgan taqdirda bu haqda rahbarini xabardor qilishi va tegishli qarorlarni qabul qilishda ishtirok etmasligi kerak.

 

Hujjat talablarini buzgan mansabdor shaxslarga nisbatan intizomiy jazo, jumladan ishdan bo‘shatishgacha bo‘lgan choralar qo‘llaniladi. Agar korrupsiya yoki boshqa jinoyat alomatlari aniqlansa, materiallar prokuratura va huquqni muhofaza qiluvchi organlarga yuboriladi.