Andijonda sobiq erini o‘ldirish uchun 3 ming dollarga qotil yollagan ayol ushlandi
Ayol uy-joy nizosi sabab erini qasddan o‘ldirmoqchi bo‘lgan.
Andijon viloyati Asaka tumanida yashovchi 1974-yilda tug‘ilgan ayol sobiq turmush o‘rtog‘ini qasddan o‘ldirishni rejalashtirgani aniqlanib, tezkor tadbir davomida ushlandi. Bu haqda viloyat IIB matbuot xizmati xabar berdi.
Ma’lum qilinishicha, ayol o‘zi bilan birga yashab kelayotgan 1972-yilda tug‘ilgan sobiq turmush o‘rtog‘ini uy-joy bilan bog‘liq nizo sabab o‘ldirishni rejalashtirgan va buning uchun 3 ming dollar evaziga yollanma qotil izlagan.
Tezkor ma’lumotlar asosida huquqni muhofaza qiluvchi organlar tomonidan maxsus tadbir o‘tkazilib, unga shartli yollanma qotil jalb etilgan. Ayol 10-iyul kuni Asaka tumanidagi turarjoy majmualaridan biri oldida qotillikni amalga oshirishi kerak bo‘lgan shaxs bilan uchrashib, xizmat haqi sifatida dastlab 5 million so‘m bergan. Shuningdek, qolgan mablag‘ni sobiq erining o‘ldirilganiga ishonch hosil qilganidan keyin to‘lashini bildirib, tilxat yozib bergan.
11-iyulga o‘tar kechasi o‘tkazilgan tezkor tadbirda shartli yollanma qotil erkakni go‘yoki o‘ldirilgandek grim yordamida tasvirlab, buyurtmachi ayolni voqea joyiga chaqirgan. Ayol sobiq erining o‘lganiga ishongach, kelishilgan pullarni berishini aytib avtomashinaga o‘tirgan vaqtida daliliy ashyolar bilan qo‘lga olingan.
Mazkur holat yuzasidan ayolga nisbatan Jinoyat kodeksining 25-moddasi orqali 97-moddasi ikkinchi qismi "i" bandi bilan jinoyat ishi qo‘zg‘atilgan. Hozirda tergov harakatlari davom etmoqda.
Eslatib o‘tamiz, joriy yilning mart oyida Namangan viloyatida bir ayol jazmani bilan til biriktirib, yollanma qotil orqali turmush o‘rtog‘ini o‘ldirishni rejalashtirgani aniqlangandi. Shuningdek, may oyida Toshkent shahrida shar’iy nikohdagi xotinini o‘ldirish uchun yollanma qotilga 10 ming dollar taklif qilgan erkak ham tezkor tadbir davomida qo‘lga olingan edi.
