Yevropada jazirama tufayli bir haftada 10 mingdan ortiq o‘lim qayd etildi

Iyun oyi oxirida G‘arbiy Yevropani qamrab olgan rekord darajadagi jazirama oqibatida 27 ta Yevropa mamlakatida o‘limlar soni odatdagidan 10 mingdan ziyodga ko‘paydi. Bu haqda ECDC va Jahon sog‘liqni saqlash tashkiloti ko‘magida faoliyat yurituvchi EuroMOMO tarmog‘i ma’lumotlariga tayanib, Reuters xabar berdi.

 

Hisobotga ko‘ra, 22–28 iyun kunlari qayd etilgan 10 650 ta qo‘shimcha o‘limning 9 mingdan ortig‘i 65 yosh va undan katta yoshdagi fuqarolar hissasiga to‘g‘ri kelgan. Mutaxassislar yuqori o‘lim ko‘rsatkichini, asosan, rekord darajadagi issiq ob-havo bilan izohlamoqda.

 

Daniyaning Statens Serum Institut bosh shifokori Lasse Vestergaardning aytishicha, yilning bu davrida bunday darajadagi ortiqcha o‘lim odatiy hol emas va uni jaziramadan boshqa omil bilan izohlash qiyin.

 

Olimlar iyun oyi oxiridagi issiq to‘lqini inson faoliyati tufayli yuzaga kelayotgan global iqlim o‘zgarishisiz deyarli imkonsiz bo‘lishini ta’kidlamoqda. Ularning fikricha, iqlim o‘zgarishi jazirama to‘lqinlarini yanada tez-tez va kuchliroq kuzatilishiga olib kelmoqda.

 

EuroMOMO ma’lumotlariga ko‘ra, iyun oyining so‘nggi haftasida Fransiya va Belgiya Yevropada "juda yuqori ortiqcha o‘lim" qayd etilgan yagona davlatlar bo‘lgan. Belgiyada esa bu ko‘rsatkich 2000-yildan buyon kuzatilgan barcha jazirama davrlari orasida eng yuqorisi sifatida qayd etilgan.

 

Shuningdek, Imperial College London, Buyuk Britaniya Meteorologiya xizmati va London gigiyena hamda tropik tibbiyot maktabi olimlari tomonidan e’lon qilingan alohida tadqiqotda may va iyun oylarida faqat Angliya va Uelsning o‘zida 2,7 ming kishi issiqlik bilan bog‘liq sabablar oqibatida vafot etgani taxmin qilingan. 

 

Tadqiqot mualliflariga ko‘ra, ushbu o‘limlarning 42 foizi global isish kuchaytirgan jazirama ta’siri bilan bog‘liq.