Anomal issiqda qator hududlarda bolalar ochiq havodagi tadbirlarga jalb etildi
Bolalar ombudsmani jazirama kunlarda bolalar salomatligini himoya qilish yuzasidan rasmiy munosabat bildirdi.
Navoiy, Qashqadaryo va Surxondaryo viloyatlaridagi ayrim maktab hamda maktabgacha ta’lim muassasalarida iyul oyining dastlabki o‘n kunligida o‘quvchilar va tarbiyalanuvchilarning ochiq havodagi tadbirlarga jalb etilgani yuzasidan Bolalar ombudsmani rasmiy munosabat bildirdi.
Qayd etilishicha, bunday holatlar bolalar salomatligiga salbiy ta’sir ko‘rsatishi mumkin hamda amaldagi sanitariya-gigiyena talablariga zid hisoblanadi. Shu munosabat bilan jazirama ob-havo sharoitida bolalarni ochiq maydonlarda o‘tkaziladigan tadbirlarga jalb etishni cheklash zarurligi ta’kidlandi.
Shuningdek, yuqori harorat va to‘g‘ridan to‘g‘ri quyosh nurlari ostida bolalarning bo‘lishiga yo‘l qo‘ygan mas’ullarga nisbatan tegishli choralar ko‘rilishi hamda bunday holatlarning takrorlanishiga yo‘l qo‘ymaslik bo‘yicha zarur choralar ko‘rilishi lozimligi qayd etildi.
Mazkur holat yuzasidan Qashqadaryo viloyati Maktabgacha va maktab ta’limi boshqarmasi ham munosabat bildirib, ijtimoiy tarmoqlarda tarqalgan foto va videolar joriy kunlarda emas, 8-iyul kuni Dehqonobod tumanida o‘tkazilgan tadbir davomida tasvirga olinganini ma’lum qildi.
Boshqarma ma’lumotiga ko‘ra, hozirda barcha hududiy bo‘limlarga anomal issiq kunlarda “Dolzarb 90 kun” tadbirlarini imkon qadar yopiq yoki salqin joylarda tashkil etish, bolalarning salomatligi va xavfsizligini ustuvor vazifa sifatida ta’minlash yuzasidan tegishli ko‘rsatmalar berilgan. Shuningdek, ayrim ijtimoiy tarmoq sahifalari holatni rasmiy manbalar orqali aniqlashtirmasdan e’lon qilgani ham tanqid qilindi.
