Toshkentda soliqchi, Farg‘onada elektr ta’minoti muhandis pora bilan ushlandi
Har ikki holat yuzasidan jinoyat ishi qo‘zg‘atilib, tergov harakatlari olib borilmoqda.
Toshkent va Farg‘ona viloyatlarida mansabdor shaxslarning noqonuniy pora talabi bilan bog‘liq ikki holat fosh etildi. Bu haqda DXX xabar berdi.
Ma’lum qilinishicha, Toshkent viloyatining Zangiota tumanidagi “Chinni bozor” savdo majmuasida faoliyat yurituvchi yakka tartibdagi tadbirkor faoliyati yuzasidan soliq tekshiruvi o‘tkazilgan. Tekshiruv davomida tadbirkor savdo tushumlarini shaxsiy bank kartasi orqali qabul qilib, ularni tadbirkorlik hisob raqamiga kiritmagani aniqlangan.
Shundan so‘ng Zangiota tumani Soliq inspeksiyasining bosh inspektori tadbirkorga 160 million so‘m jarima qo‘llanilishini aytib, ushbu masalani hal qilib berish evaziga 1000 AQSH dollari talab qilgan.
Davlat xavfsizlik xizmati hamda Bosh prokuratura huzuridagi Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda soliqchining topshirig‘i bilan tadbirkordan pulni olgan vositachi ashyoviy dalillar bilan ushlangan.
Shunga o‘xshash holat Farg‘ona viloyatining Buvayda tumanida ham aniqlangan. Tezkor tadbir davomida tuman Elektr ta’minoti korxonasi muhandisi quyosh panellari o‘rnatish bilan shug‘ullanuvchi tadbirkordan noqonuniy ravishda 1000 AQSH dollari olayotgan vaqtida qo‘lga olingan.
Tergov ma’lumotlariga ko‘ra, muhandis tadbirkorga mijozlar yo‘naltirish, zarur hujjatlarni rasmiylashtirish va texnik shartnoma olishda yordam berish evaziga jami 5 ming AQSH dollari talab qilgan.
Har ikki holat yuzasidan mansabdor shaxslarga nisbatan jinoyat ishlari qo‘zg‘atilib, tergov harakatlari olib borilmoqda.
