Turkmanistonda O‘zbekiston SIM kartalariga qarshi reydlar boshlandi
Bunga Toshhovuz viloyatida bir erkakning olti nafar farzandi va o‘z joniga qasd qilgani haqidagi xabar internetda keng tarqalib ketgani sabab bo‘lishi mumkin.
Turkmanistonda O‘zbekiston mobil aloqa operatorlarining SIM kartalaridan foydalanayotgan fuqarolarni aniqlash bo‘yicha reydlar o‘tkazilmoqda. Bu haqda Ozodlik radiosi xabar berdi.
Ma’lum qilinishicha, O‘zbekiston bilan chegaradosh Toshhovuz viloyatidagi 60 dan ortiq aholi punktida tekshiruvlar olib borilmoqda. So‘nggi kunlarda Diovar qishlog‘ida kamida o‘nta oiladan O‘zbekiston operatorlariga tegishli SIM kartalar musodara qilingan.
Xabarga ko‘ra, ayrim holatlarda huquq-tartibot idoralari fuqarolarni ogohlantirish bilan cheklanmoqda. Biroq ko‘pchilikka xorijiy aloqa xizmatlaridan foydalanganlik uchun 50 ming manat miqdorida jarima yoki qamoq jazosi qo‘llanishi mumkinligi aytilmoqda.
Rasmiylar buni ayrim hollarda xorijiy davlat manfaatiga josuslik sifatida baholanishi mumkinligi bilan izohlayotgani qayd etilgan. Chegaraoldi hududlari aholisi jurnalistlarga Turkmaniston aloqa operatorlarida signal sifati pastligi va internetdan foydalanish imkoniyatlari cheklangani sabab O‘zbekiston operatorlari xizmatlarini afzal ko‘rishini bildirgan.
Ularning ta’kidlashicha, O‘zbekiston mobil interneti tezligi mahalliy operatorlarnikidan bir necha yuz baravar yuqori. Shu sababli O‘zbekistonga tez-tez qatnaydigan turkmanistonliklar u yerdan SIM kartalar va Wi-Fi routerlar olib kiradi. Ayrim tadbirkorlar esa qo‘shni davlat operatorlariga ulanish xizmatlarini pulli asosda taklif qilib, uskunalarni ro‘yxatdan o‘tkazishda ham yordam beradi. Hududda eng ommabop tarmoqlar sifatida Uztelecom va Ucell tilga olinmoqda.
Ozodlik radiosi suhbatlashgan manbalarga ko‘ra, reydlarning kuchayishiga Toshhovuz viloyatida bir erkakning olti nafar farzandi va o‘z joniga qasd qilgani haqidagi xabar internetda keng tarqalib ketgani sabab bo‘lishi mumkin. Taxminlarga ko‘ra, mazkur voqea haqidagi ma’lumotlar O‘zbekiston operatorlari mobil interneti orqali tarqatilgani ortidan nazorat kuchaytirilgan.
Shuningdek, manbalar Turkmaniston kuch ishlatar tuzilmalarida O‘zbekiston SIM kartalarini masofadan kuzatishga imkon beruvchi maxsus uskunalar mavjud emasligini bildirgan. Shu bois qoidabuzarlarni aniqlash uchun huquqni muhofaza qiluvchi organlar xodimlari joylarda bevosita tekshiruvlar o‘tkazayotgani aytilmoqda.
