“Angliyaga qarshi bahs futboldan kattaroq”: Argentina vitse-prezidenti inglizlarni “qaroqchilar” deb atadi
Viktoriya Vilyarruel Jahon chempionati yarim finalida Angliyaga qarshi bahs oldidan keskin bayonot bilan chiqdi. Skalone uchrashuvga siyosiy tus bermaslikka chaqirdi.
Argentina vitse-prezidenti Viktoriya Vilyarruel Jahon chempionati yarim finali oldidan Angliyaga qarshi bo‘ladigan uchrashuv yuzasidan X ijtimoiy tarmog‘ida bayonot berdi. Bu haqda Al Jazeera xabar berdi.
“Biz bosqinchi,qaroqchilarga qarshi o‘ynaymiz. Bu shunchaki navbatdagi o‘yin emas”, — deb yozdi u.
Vilyarruelning ta’kidlashicha, Angliyaga qarshi bahs Argentina uchun nafaqat sport, balki tarixiy va siyosiy ramziy ahamiyatga ham ega.
“Bu Malvin orollari, bu Diego, bu Leoning so‘nggi mundiali va bosqinchilarni to‘xtatish masalasidir”, — dedi vitse-prezident marhum futbol afsonasi Diego Maradona hamda terma jamoa sardori Lionel Messini nazarda tutib.
Mazkur bayonot Janubiy Atlantikadagi Folklend (Argentinada Malvin deb ataladi) orollari ustidan davom etayotgan hududiy nizolar fonida yangradi. Vilyarruelning otasi 1982-yilda Argentina va Buyuk Britaniya o‘rtasida Folklend orollari uchun bo‘lib o‘tgan urushda qatnashgan.
Shu bilan birga, Argentina terma jamoasi bosh murabbiyi Lionel Skalone uchrashuvga siyosiy tus bermaslikka chaqirdi.
“Bu oddiy futbol o‘yini, xolos. Futbolni siyosat bilan aralashtirish telbalik bo‘lardi”, — dedi u.
Shuningdek, Argentina xavfsizlik vazirligi yarim final bo‘lib o‘tadigan AQSHning Atlanta shahridagi stadionda Folklend (Malvin) orollariga oid bayroqlar va boshqa ramziy buyumlarni olib kirish taqiqlanishini ma’lum qildi.
