Salomatligingiz va tabiatni asrang: Ekologiya qo‘mitasi muhim ogohlantirish bilan chiqdi
Havo harorati ayrim hududlarda 48 darajagacha ko‘tarilishi kutilayotgani sababli qo‘mita fuqarolarni o‘z salomatligi, daraxtlar va hayvonot dunyosini asrashga chaqirdi.
Gidrometeorologiya xizmati agentligi ma’lumotlariga ko‘ra, 18–20-iyul kunlari O‘zbekiston hududiga janubdan o‘ta issiq havo massalarining kirib kelishi davom etadi. Respublika bo‘yicha havo harorati 43–45°C gacha, janubiy va cho‘l hududlarining ayrim joylarida esa 46–48°C gacha ko‘tarilishi kutilmoqda. Shamol tezligi 13–18 m/s gacha, ayrim joylarda 20–22 m/s gacha kuchayadi. Ba’zi hududlarda chang va qum bo‘ronlari kuzatilishi mumkin.
Ekologiya va iqlim o‘zgarishi milliy qo‘mitasi fuqarolarga kunning eng issiq vaqtlarida ochiq quyosh ostida uzoq qolmaslik, ko‘proq suyuqlik iste’mol qilish hamda zarur ehtiyot choralariga amal qilishni tavsiya etdi.
Qayd etilishicha, yuqori harorat atrof-muhitga ham salbiy ta’sir ko‘rsatishi mumkin. Xususan, daraxt va butalarning qurishi, yosh ko‘chatlarning nobud bo‘lishi hamda hayvonot dunyosiga zarar yetishi xavfi ortadi.
Shu munosabat bilan qo‘mita mutasaddi tashkilotlarni, ayniqsa, “Yashil makon” umummilliy loyihasi doirasida ekilgan yosh ko‘chatlarni o‘z vaqtida sug‘orish va qo‘shimcha parvarishlashga alohida e’tibor qaratishga chaqirdi.
Mahalliy hokimliklar, kommunal xizmatlar va boshqa mas’ul tashkilotlarga yashil hududlarni sug‘orishni kuchaytirish, jamoat joylarini sovitish, sug‘orish tizimlarining uzluksiz ishlashini ta’minlash hamda tabiiy yong‘inlarning oldini olish bo‘yicha qo‘shimcha choralar ko‘rish tavsiya etildi.
“Bugun saqlab qolingan har bir daraxt, sug‘orilgan har bir ko‘chat va o‘z vaqtida ko‘rilgan har bir chora mamlakatimizning ekologik xavfsizligi hamda barqaror kelajagiga qo‘shilgan munosib hissadir”, deyiladi xabarda.
