Zangiotada “zapravka” portladi: uch kishi jarohatlandi
Hozirda hodisaning kelib chiqish sabablari o'rganilmoqda.
Toshkent viloyatining Zangiota tumanida joylashgan avtomobillarga propan gaz to‘ldirish shoxobchasida portlash sodir bo‘ldi. Hodisa oqibatida uch nafar fuqaro tan jarohati oldi. Bu haqda Favqulodda vaziyatlar vazirligi ma’lum qildi.
Qayd etilishicha, 16-iyul kuni soat 22:46 da Toshkent viloyati Favqulodda vaziyatlar boshqarmasiga Zangiota tumani hududidan o‘tuvchi M-39 avtomobil yo‘li bo‘yida joylashgan avtomobillarga propan gaz to‘ldirish shoxobchasida favqulodda holat yuz bergani haqida xabar kelib tushgan.
Dastlabki ma’lumotlarga ko‘ra, shoxobcha hududidagi propan gaz saqlash sig‘imi hamda propan tashishga mo‘ljallangan maxsus avtomobilda chaqnash sodir bo‘lgan.
Voqea joyiga zudlik bilan yetib borgan qutqaruvchilar yong‘inni 17-iyul kuni soat 00:04 da to‘liq bartaraf etgan.
Hodisa oqibatida tan jarohati olgan uch nafar fuqaro shoshilinch tibbiy yordam brigadalari tomonidan shifoxonaga olib borilgan. Ularning salomatligi yuzasidan qo‘shimcha ma’lumot berilmagan.
Hozirda hodisaning kelib chiqish sabablari bo‘yicha tegishli tartibda surishtiruv ishlari olib borilmoqda.
Eslatib o‘tamiz, avvalroq Qarshi shahridagi avtomobillarga gaz to‘ldirish shoxobchasida yuz bergan portlash oqibatida 6 kishi halok bo‘lgandi.
