Қаршидаги “заправка” портлашида 6 киши ҳалок бўлди
Ҳодиса натижасида яна 5 нафар фуқаро турли тан жароҳатлари билан шифохонага ётқизилган.
Қашқадарё вилоятининг Қарши туманида жойлашган маиший газ баллонларига суюлтирилган газ қуйиш шохобчасида юз берган портлаш оқибатида 6 нафар фуқаро ҳалок бўлди, яна 5 нафар фуқаро турли даражадаги тан жароҳатлари билан шифохонага ётқизилди.
Фавқулодда вазиятлар вазирлиги маълумотига кўра, ҳодиса 8-июн куни соат 13:50 да Қарши туманининг “Чаман” маҳалла фуқаролар йиғини ҳудудида жойлашган МЧЖ шаклидаги газ қуйиш шохобчасида содир бўлган.
Хабар келиб тушгач, воқеа жойига 5 та қутқарув бўлинмаси жалб этилган. Қутқарувчилар соат 14:02 да ҳодиса жойига етиб борган. Ёнғин соат 14:05 да қуршаб олиниб, соат 14:55 да тўлиқ бартараф этилган.
Дастлабки маълумотларга кўра, портлаш ва ёнғин оқибатида 4 та автомобил, жумладан 2 та Cоbalt ҳамда газ ташишга мўлжалланган 2 та махсус транспорт воситаси зарар кўрган. Шунингдек, 2 та ер ости ёқилғи сақлаш резервуари ҳам ёнган.
Ҳодиса оқибатларини бартараф этиш, жабрланганларга зарур ёрдам кўрсатиш ҳамда портлаш сабабларини аниқлаш мақсадида Ўзбекистон Президенти топшириғига асосан Бош вазир ўринбосари Очилбой Раматов бошчилигида Ҳукумат комиссияси тузилган.
Комиссияга жабрланганларга амалий ёрдам кўрсатиш, портлашнинг келиб чиқиш сабабларини ўрганиш, зарар кўламини аниқлаш ҳамда келгусида бундай ҳодисаларнинг олдини олиш бўйича таклифлар ишлаб чиқиш вазифалари юклатилган.
Айни пайтда ҳодиса содир бўлган ҳудуд тўлиқ назоратга олинган бўлиб, оқибатларни бартараф этиш ишлари давом эттирилмоқда.
