Norvegiyada so‘nggi 100 yildagi eng yirik yong‘in yuz berdi
Hodisa sabab yuzlab aholi evakuatsiya qilindi.
Norvegiyaning Drammen munitsipalitetiga qarashli Krokstadelva qishlog‘ida yuz bergan yirik yong‘in oqibatida 100 dan ortiq turar joy yonib ketdi. Bu haqda Aftenposten nashri xabar berdi.
Ma’lum qilinishicha, yong‘in avval qishloqda boshlangan, keyinchalik yaqin atrofdagi o‘rmonga tarqalgan. Mahalliy OAV bu hodisani Norvegiyada so‘nggi 100 yil ichidagi eng yirik yong‘in deb baholamoqda.
Yong‘in sabab yuzlab odamlar xavfsiz hududlarga evakuatsiya qilingan. Hozircha bedarak yo‘qolganlar haqida ma’lumot yo‘q. Ikki nafar mahalliy fuqaro yonish mahsulotlaridan zaharlanish oqibatida shifoxonaga yotqizilgan.
Reuters agentligining yozishicha, kuchli shamol yong‘inni tez tarqatgan, qalin qora tutun esa Oslodan taxminan 50 kilometr g‘arbdagi hududni qoplagan.
Aftenposten ma’lumotiga ko‘ra, mahalliy yong‘in-qutqaruv xizmati vaziyatni nazoratga olish uchun Norvegiya hukumatidan qo‘shimcha yordam so‘ragan.
“Biz hali ham yong‘inni to‘liq nazorat ostiga olganimiz yo‘q”, — dedi Drammen munitsipaliteti yong‘in xizmati rahbari Inge Vergeland.
