Samarqandda Qoradaryoda ahvoli yomonlashgan erkak qutqarib qolindi
Daryoda cho‘milayotgan fuqaroning birdan sog‘ligi yomonlashib harakatlana olmay qolgan.
Samarqand viloyatining Samarqand tumanida cho‘milish vaqtida ahvoli yomonlashgan fuqaro Favqulodda vaziyatlar vazirligi qutqaruvchilari tomonidan qutqarib qolindi. Bu haqda FVV xabar berdi.
Ma’lum qilinishicha, hodisa 17 iyul kuni soat 17:53 da Samarqand tumanidagi "Sh. Rashidov" mahalla fuqarolar yig‘ini hududidan oqib o‘tuvchi Qoradaryo daryosida sodir bo‘lgan. Fuqaro cho‘milayotgan paytda birdan o‘zini yomon his qilib, mustaqil ravishda harakatlana olmay qolgan. Uning sheriklari bu haqda "112" tizimi orqali Favqulodda vaziyatlar boshqarmasiga xabar bergan.
Voqea joyiga tezkor yetib borgan qutqaruvchilar maxsus narvon yordamida fuqaroni daryo qirg‘og‘idan xavfsiz hududga olib chiqqan. Shundan so‘ng unga malakali tibbiy yordam ko‘rsatilishi uchun tibbiyot xodimlariga topshirilgan.
FVV ma’lumotiga ko‘ra, ayni paytda fuqaroning ahvoli yaxshi.
