Hokimliklarga anomal issiqda obodonlashtirish xodimlari xavfsizligini ta’minlash bo‘yicha ko‘rsatma yuborildi
Davlat mehnat inspeksiyasi havo harorati yuqori bo‘lgan soat 10:00 dan 17:00 gacha xodimlar hayoti va sog‘lig‘iga xavf tug‘dirishi mumkin bo‘lgan ishlarni vaqtincha to‘xtatishni talab qildi.
Davlat mehnat inspeksiyasi anomal issiq ob-havo sharoitida ochiq havoda mehnat qilayotgan obodonlashtirish xodimlarining hayoti va sog‘lig‘ini muhofaza qilish maqsadida barcha hokimliklarga maxsus ko‘rsatma yubordi.
Ko‘rsatmaga muvofiq, havo harorati yuqori bo‘lgan soat 10:00 dan 17:00 gacha xodimlarning hayoti va sog‘lig‘iga xavf tug‘dirishi mumkin bo‘lgan ochiq havodagi ishlar vaqtincha to‘xtatilishi hamda moslashuvchan ish rejimi joriy etilishi lozim.
Shuningdek, ish beruvchilarga xodimlarni yetarli miqdorda sifatli ichimlik suvi bilan ta’minlash, quyosh nurlari va yuqori haroratdan himoyalangan dam olish joylarini tashkil etish, ularni shaxsiy himoya vositalari bilan ta’minlash hamda mehnat va dam olish rejimini qayta ko‘rib chiqish topshirildi.
Bundan tashqari, majburiy tibbiy ko‘rikdan o‘tmagan yoki tibbiy xulosaga ko‘ra ishga yaroqsiz deb topilgan shaxslarni ishga jalb etmaslik, yuqori harorat ta’sirida salomatligi yomonlashgan xodimlarga esa zudlik bilan birinchi tibbiy yordam ko‘rsatish talab etiladi.
Davlat mehnat inspeksiyasi mazkur ko‘rsatmalar ijrosi nazoratga olinganini ma’lum qildi. Qayd etilishicha, mehnatni muhofaza qilish talablarini buzgan shaxslar amaldagi qonunchilikka muvofiq javobgarlikka tortiladi.
