Kogonda Koreyaga ishga yuborish bilan bog‘liq firibgarlik aniqlandi
Gumonlanuvchi yuqori lavozimlarda ishlovchi tanishlari orqali fuqaroni ishga yubormoqchi bo‘lgan.
Bosh prokuratura huzuridagi Departamentning Kogon shahri bo‘limi tomonidan o‘tkazilgan tergovga qadar tekshiruvda Koreya Respublikasiga ishga yuborishni va’da qilib, fuqaroni aldagan shaxs fosh etildi.
Ma’lum qilinishicha, fuqaro Z.I. fuqaro Sh.I.ning ishonchiga kirib, uni go‘yoki yuqori lavozimlarda ishlovchi tanishlari orqali 8 ming AQSH dollari evaziga Koreyaga ishga yuborishini aytgan. U kelishilgan mablag‘ning 1 ming AQSH dollarini firibgarlik yo‘li bilan qo‘lga kiritgan.
Tekshiruv davomida ushbu mablag‘ hisobidan 200 AQSH dollari jabrlanuvchiga qaytarilgani protsessual tartibda rasmiylashtirilgan.
Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.
