O‘zbekistonda anomal issiqda hashar o‘tkazganlar javobgarlikka tortiladi
Mehnat inspeksiyasi anomal issiq ob-havo sharoitida fuqarolar salomatligini himoya qilish maqsadida jamoaviy ishlarni cheklash bo‘yicha ogohlantirish bilan chiqdi.
O‘zbekistonda anomal issiqda hashar o‘tkazganlar va jamoaviy ishlarni tashkil etganlar javobgarlikka tortiladi. Bu haqda Davlat mehnat inspeksiyasi xabar berdi.
Respublika hududida kuzatilayotgan anomal issiq ob-havo sharoitida ochiq havoda uzoq vaqt ishlash issiq urishi, suvsizlanish, yurak-qon tomir va asab tizimi faoliyatining buzilishi kabi og‘ir oqibatlarga olib kelishi mumkin.
Ma’lum qiliinishicha, O‘zbekiston Respublikasi Mehnat kodeksining 359-moddasi hamda 0069-24-sonli sanitariya qoidalari va normalariga (SanQvaN) muvofiq, yilning issiq davrida ochiq hududlarda havo harorati 36 daraja va undan yuqori bo‘lsa, bunday sharoit o‘ta xavfli (ekstremal) mehnat sharoiti hisoblanadi.
Shu munosabat bilan, soat 10:00 dan 17:00 gacha ochiq hududlarda hasharlar, ommaviy mehnat tadbirlari va boshqa jamoaviy ishlarni tashkil etmaslik talab etildi. Zarur ishlarni imkon qadar ertalab soat 10:00 gacha yoki kechki soat 17:00 dan keyin bajarish tavsiya qilindi.
Kechiktirib bo‘lmaydigan ishlarni bajarishda esa mehnat va dam olishning maxsus rejimini joriy etish, ish vaqtini qisqartirish, xodimlarni soyali dam olish joylari, ichimlik suvi, shaxsiy himoya vositalari hamda birinchi tibbiy yordam vositalari bilan ta’minlash zarurligi qayd etildi.
Shuningdek, yuqori harorat sharoitida ishlayotgan xodimlarning sog‘lig‘i ustidan doimiy nazorat o‘rnatish, ahvoli yomonlashgan taqdirda ularni zudlik bilan ishdan ozod qilish va zarur tibbiy yordam ko‘rsatish lozimligi ta’kidlandi.
Davlat mehnat inspeksiyasi mehnatni muhofaza qilish to‘g‘risidagi qonunchilik talablarini buzish hamda xodimlar hayoti va sog‘lig‘iga xavf tug‘diruvchi mehnat sharoitlarini yaratish qonunchilikda belgilangan tartibda javobgarlikka sabab bo‘lishini eslatdi.
