Toshkent va uning atrofidagi issiqxonalar uchun yer hamda mol-mulk solig‘i 10 baravar oshirilishi mumkin
Isitish qozonxonalari demontaj qilingan yoki elektr energiyasi bilan isitiladigan issiqxonalarga oshirilgan mol-mulk va yer solig‘i tatbiq etilmaydi.
Toshkent shahri va Toshkent viloyatining ayrim tumanlarida joylashgan issiqxonalarga nisbatan yer va mol-mulk solig‘ining oshirilgan stavkalarini joriy etish taklif qilinmoqda. Tegishli qonun loyihasi 31-iyulga qadar jamoatchilik muhokamasiga qo‘yildi.
Loyihaga ko‘ra, Toshkent shahri hamda Toshkent viloyatining Yuqori Chirchiq, Qibray, Yangiyo‘l, Zangiota va Toshkent tumanlaridagi issiqxonalar egallagan qishloq xo‘jaligi yerlariga yer solig‘i amaldagi stavkaning 10 baravari miqdorida belgilanadi. Shuningdek, bunday issiqxonalarga nisbatan amaldagi soliq imtiyozlari qo‘llanilmaydi.
Bunda isitish qozonxonalari demontaj qilingan yoki elektr energiyasi bilan isitiladigan issiqxonalarga oshirilgan mol-mulk va yer solig‘i tatbiq etilmaydi. Bu haqdagi ma’lumotlarni ekologiya va atrof-muhitni muhofaza qilish sohasidagi vakolatli organ taqdim etadi.
Qonun loyihasiga ko‘ra, mazkur o‘zgartirishlardan maqsad Toshkent shahri va viloyatidagi ekologik vaziyatga issiqxona xo‘jaliklarining salbiy ta’sirini kamaytirish hamda issiqxonalarda ekologik xavfsiz va energiya tejamkor isitish texnologiyalaridan foydalanishni rag‘batlantirishdan iborat.
Vazirlar Mahkamasining 2026-yil 9-apreldagi qaroriga muvofiq, Toshkent shahri hamda Toshkent viloyatining Yuqori Chirchiq, Qibray, Yangiyo‘l, Zangiota va Toshkent tumanlarida ko‘mir, mazut va atmosferaga zararli boshqa yoqilg‘ilardan foydalanadigan yangi issiqxona xo‘jaliklarini tashkil etish hamda ularni davlat ro‘yxatidan o‘tkazish 2026-yil 1-iyundan taqiqlangan.
Shuningdek, atrof-muhit va aholi salomatligiga salbiy ta’sir ko‘rsatayotgan Toshkent shahri va viloyatidagi issiqxona xo‘jaliklarini Surxondaryo viloyatidagi “Surxon-Agro” erkin iqtisodiy zonasiga bosqichma-bosqich ko‘chirish rejalashtirilgan.
