Argentinaning JCH-2026 finalidagi mag‘lubiyatdan so‘ng Buenos-Ayresda tartibsizliklar yuz berdi
Tartibsizliklar oqibatida kamida 15 kishi qo‘lga olindi.
2026 yilgi FIFA Jahon chempionati finalida Argentina terma jamoasining Ispaniyaga mag‘lub bo‘lganidan so‘ng Buenos-Ayres markazida muxlislar va politsiya o‘rtasida to‘qnashuvlar yuz berdi.
Voqea Argentina poytaxtidagi futbol bayramlari an’anaviy tarzda nishonlanadigan Obelisk yodgorligi atrofida sodir bo‘lgan. Final uchrashuvini tomosha qilish uchun minglab muxlislar ushbu hududga to‘plangan. Vaziyat yarim tungacha tinch kechgan, biroq bir guruh muxlis himoya to‘siqlarini buzib o‘tishga uringanidan keyin tartibsizliklar boshlangan.
Shundan so‘ng ayrim muxlislar politsiya xodimlariga shisha idishlar va boshqa buyumlarni uloqtirgan. Huquq-tartibot idoralari olomonni tarqatish uchun ko‘zdan yosh oqizuvchi gaz hamda suv purkagich mashinalardan foydalangan.
Mahalliy OAV tarqatgan suratlarda ko‘chalarga turli buyumlar sochilib ketgani, shuningdek, yerda yotgan muxlisni tepgan politsiyachi aks etgani aytilmoqda.
Rasmiy ma’lumotlarga ko‘ra, tartibsizliklar ortidan kamida 15 kishi qo‘lga olingan. Yana bir necha kishi jarohatlangan, biroq ularning ahvoli haqida batafsil ma’lumot berilmagan.
Final uchrashuvida Ispaniya qo‘shimcha bo‘limlarda Ferran Torres urgan gol evaziga 1:0 hisobida g‘alaba qozonib, o‘z tarixidagi ikkinchi jahon chempionligi unvonini qo‘lga kiritdi.
Uchrashuv intizomiy mojarolar bilan ham yodda qoldi. Argentina yarim himoyachisi Enso Fernandes o‘yin davomida qizil kartochka oldi. Leandro Paredes esa final hushtagidan so‘ng Ispaniya himoyachisi Erik Garsiyaga nisbatan tajovuzkor harakat qilgani uchun maydondan chetlatildi.
Shu bilan birga, Argentina prezidenti Xavyer Miley terma jamoani qo‘llab-quvvatlash maqsadida mamlakatda umumxalq dam olish kuni e’lon qilinishini ma’lum qildi. Bayram sanasi futbolchilar va murabbiylar shtabi bilan kelishilgan holda belgilanadi.
