OAVda faoliyat yuritayotgan xotin-qizlar uchun “Atirgul – 2026” tanlovi e’lon qilindi
Tanlovga nomzodlar bo‘yicha tavsiyanomalar 2026 yilning 20 iyulidan 20 avgustigacha qabul qilinadi. Tanlov g‘oliblari O‘zbekiston Mustaqilligining 35 yilligi arafasida e’lon qilinadi.
O‘zbekiston Jurnalistlar uyushmasi Oila va xotin-qizlar qo‘mitasi bilan hamkorlikda O‘zbekiston Respublikasi Mustaqilligining 35 yilligi munosabati bilan ommaviy axborot vositalarida faoliyat yuritayotgan xotin-qizlar o‘rtasida “Atirgul – 2026” respublika ko‘rik-tanlovini e’lon qildi.
Tanlov xotin-qizlarning ijtimoiy-siyosiy faolligini oshirish, oila institutini mustahkamlash, milliy qadriyatlar va ma’naviy merosni targ‘ib qilish, shuningdek, xotin-qizlarga nisbatan tazyiq va zo‘ravonlikning oldini olish maqsadida tashkil etilmoqda.
Shuningdek, tanlov “Yangi O‘zbekiston – 2030” strategiyasi, davlat dasturlari hamda milliy taraqqiyot konsepsiyalariga muvofiq ravishda OAVda faoliyat yuritayotgan xotin-qiz jurnalistlarni rag‘batlantirish va ularning yutuqlarini e’tirof etishga qaratilgan.
Ko‘rik-tanlov 12 ta nominatsiya bo‘yicha o‘tkaziladi:
1. Eng yaxshi televizion jurnalistik material
(teletasvir, telereportaj, intervyu, maxsus ko‘rsatuv)
2. Eng yaxshi radio jurnalistik material
(radioeshittirish, intervyu, mualliflik dasturi)
3. Eng yaxshi bosma OAV materiali
(maqola, ocherk, tahliliy material, intervyu)
4. Eng yaxshi internet jurnalistika materiali
(onlayn maqola, multimedia loyihasi, veb-jurnalistika)
5. Eng yaxshi ijtimoiy tarmoq loyihasi
(Telegram, YouTube, Facebook, Instagram platformalaridagi ijodiy loyihalar)
6. Eng yaxshi surishtiruv jurnalistikasi
(ijtimoiy muammolarga bag‘ishlangan tahliliy surishtiruv)
7. Eng yaxshi fotojurnalistika ishi
(fotoreportaj, ijtimoiy fotoocherk)
8. Eng yaxshi hujjatli film yoki maxsus medialoyiha
9. Eng yaxshi yosh jurnalist
(30 yoshgacha bo‘lgan jurnalistlar uchun)
10. Eng yaxshi hududiy jurnalistik material
11. Jamoatchilik e’tirofi mukofoti
12. Hakamlar hay’atining maxsus mukofoti
Tanlovga nomzodlar O‘zbekiston Jurnalistlar uyushmasining hududiy bo‘limlari, Uyushma qoshidagi Ijodiy kengashlar, Oila va xotin-qizlar qo‘mitasi tomonidan tavsiya etiladi.
Tanlovga nomzodlar bo‘yicha tavsiyanomalar 2026 yilning 20 iyulidan 2026 yilning 20 avgustigacha qabul qilinadi.
Nomzodlarning hujjatlarini ko‘rib chiqish va tanlov g‘oliblarini e’lon qilish bo‘yicha yakuniy xulosaviy qaror tanlov Hakamlar hay’ati tomonidan qabul qilinadi.
Tanlov g‘oliblari O‘zbekiston Respublikasi davlat mustaqilligining 35 yilligi arafasida e’lon qilinadi va maxsus diplom, esdalik statuetkasi hamda pul mukofoti bilan taqdirlanadi.
