Tramp Kanadaning ayrim mahsulotlariga 50 foizlik boj joriy qildi
Kanada bosh vaziri bu qarorni AQSH–Kanada–Meksika erkin savdo kelishuviga zid deb baholadi.
AQSH prezidenti Donald Tramp Kanada importining qariyb 20 milliard dollarlik qismiga 50 foizlik boj joriy etish haqidagi farmonni imzoladi. Oq uy bu qarorni Kanada tomonidan AQSH mahsulotlariga nisbatan qo‘llanayotgan savdo cheklovlari bilan izohladi. Bu haqda BBC xabar berdi.
Yangi tariflar vino, mebel, sport anjomlari va boshqa qator mahsulotlarni qamrab oladi. Biroq energetika mahsulotlari, kaliy o‘g‘itlari, baliq mahsulotlari hamda muhim foydali qazilmalar ushbu bojlar ro‘yxatiga kiritilmagan.
Kanada bosh vaziri Mark Karni Tramp qarorini AQSH–Kanada–Meksika erkin savdo kelishuviga zid deb baholadi. U hukumat Kanada ishchilari va korxonalarini himoya qilishini hamda AQSH bilan savdo muzokaralarini yanada jadallashtirishini bildirdi.
Karni, shuningdek, zarurat tug‘ilganda Kanada javob choralarini ko‘rishi mumkinligini ta’kidlagan. Tomonlarga yangi tariflar kuchga kirishidan oldin muzokaralar olib borish uchun 30 kunlik muddat berilgan.
Mutaxassislar yangi bojlar Shimoliy Amerikadagi savdo munosabatlarini yanada keskinlashtirishi, ayrim mahsulotlar narxining oshishiga va ikki davlat o‘rtasidagi iqtisodiy ziddiyatlarning kuchayishiga olib kelishi mumkinligini ta’kidlamoqda.
