Mamdani Netanyaxuni hibsga olish vakolati yo‘qligini tan oldi
Avvalroq Netanyaxuning BMT Bosh Assambleyasiga tashrifi vaqtida uni hibsga olish ehtimoli muhokama qilingandi.
Nyu-York shahri meri Zohran Mamdani shahar ma’muriyatida Isroil Bosh vaziri Benyamin Netanyaxuni Xalqaro jinoyat sudi (XJS) orderi asosida hibsga olish bo‘yicha huquqiy vakolat mavjud emasligini ma’lum qildi.
Mamdani X ijtimoiy tarmog‘ida e’lon qilgan videomurojaatida XJS qarorini amalga oshirish shaharning vakolatiga kirmasligini, biroq bunday vakolat federal hukumat ixtiyorida ekanini ta’kidlagan.
Shuningdek, u AQSh federal hukumatini Xalqaro jinoyat sudiga qo‘shilish va sud qarorlarini ijro etish masalasini ko‘rib chiqishga chaqirgan.
Avvalroq Mamdani Nyu-York shahar Adliya departamenti Benyamin Netanyaxu sentyabr oyida BMT Bosh Assambleyasi tadbirlarida ishtirok etish uchun shaharga tashrif buyurgan taqdirda, XJS orderini ijro etish imkoniyatlarini o‘rganayotganini ma’lum qilgandi. Bunga javoban AQSh prezidenti Donald Tramp Netanyaxuning AQShga tashrifi chog‘ida uning hibsga olinishi mumkin emasligini bildirgan.
Eslatib o‘tamiz, 2024-yil noyabr oyida Xalqaro jinoyat sudi Benyamin Netanyaxu va Isroilning sobiq mudofaa vaziri Yoav Galantni G‘azodagi mojaroga aloqador urush jinoyatlari hamda insoniyatga qarshi jinoyatlarda gumon qilib, ularni hibsga olishga order bergan edi. Isroil va AQSh esa XJS yurisdiksiyasini tan olmaydi.
